काठमाडौं- नेपाली कांग्रेसको १५औँ केन्द्रीय महाधिवेशनअन्तर्गत बुधबार देशभरका पालिकामा अधिवेशन प्रक्रिया अघि बढेको छ।

कांग्रेस केन्द्रीय कार्यसमितिको निर्णयअनुसार असोज १६ देखि १९ गतेसम्म हुने १५औँ केन्द्रीय महाधिवेशनका लागि जारी निर्वाचन कार्यतालिकाअनुसार बुधबार ५८ जिल्लाका ५१२ पालिकामा उद्घाटन तथा बन्द सत्रसहित निर्वाचन प्रक्रिया सुरु भएको कांग्रेसले जनाएको छ।

कांग्रेसका अनुसार बाँकी २४१ पालिकामा असोज ८ र ९ गते अधिवेशन प्रक्रिया सञ्चालन हुनेछ। यसैबीच, जल तथा मौसम विभागले असोज ८ देखि १२ गतेसम्म भारी वर्षाको पूर्वानुमान गरेपछि कांग्रेसले अधिवेशनका लागि खटिएका निर्वाचन अधिकृतलाई मौसमको अवस्थालाई ध्यानमा राख्न निर्देशन दिएको छ।

कांग्रेस केन्द्रीय निर्वाचन समितिका सदस्य सचिव राजु कटुवालले सम्बन्धित निर्वाचन अधिकृतलाई आफ्नो मातहतका पालिका, प्रदेश सभा र प्रतिनिधिसभा निर्वाचन क्षेत्रमा अधिवेशन सञ्चालन गर्दा मौसमको अवस्था हेरी अनुकूल समय मिलाउन निर्देशन दिएका छन्।