काठमाडौं- नेकपा एमालेका केन्द्रीय कमिटी सदस्य विष्णु रिजालले नेपाली सेनासँग पार्टीको सम्बन्ध के हो भन्ने कुरा स्पष्ट पार्न माग गरेका छन् । पार्टी केन्द्रीय कमिटी बैठकमा बुधबार धारणा राख्दै रिजालले यस्तो माग गरेका हुन् ।

रिजालले नेपाली सेनाप्रति एमालेको दृष्टिकोण के हो भन्ने प्रश्न गर्दै पार्टीको निशाना सेना नै हो जस्तो गरी संसद्मा बारम्बार प्रष्तुत हुनुले थप संशय पैदा गरेको बताएका छन् ।

‘अध्यक्ष कमरेड स्वयम्ले भन्नुभएको छ- पाँच मिनेट ढिलो भएको भए लागू पदार्थ खुवाएर ल्याएकाहरूले मलाई बालुवाटारमै मार्ने थिए । राधिका शाक्य म्याडमको पनि अस्ति त्यस्तै धारणा आएको छ । भदौ २३-२४ मा सेनाको भूमिकाबारे कैयौँ अनुत्तरित प्रश्न छन्’, रिजालले भने, ‘सेनाले हाम्रो नेतृत्वको सुरक्षा र सहजीकरण गरेको छ । एमालेको आजको मुख्य निशाना सेना नै हो जस्तो गरेर संसद्मा बारम्बार प्रस्तुत हुँदा पार्टीकै दृष्टिकोण त्यही हो कि भन्ने भएको छ । राज्यको स्थायी संरचनासँग टकराव बढाएको छ । यसबारे पार्टीले स्पष्ट पार्नुपर्छ ।’

रिजालले पार्टी अध्यक्ष केपी शर्मा ओलीको प्रतिवेदनप्रति समर्थन गर्दै उपाध्यक्ष विष्णु पौडेल र महासचिव शंकर पोखरेलको थप व्याख्याबाट मुख्य नेताहरूबीचको अविश्वासको बादल पनि हटेको बताए ।

‘अध्यक्ष कमरेडको प्रतिवेदनले आफ्ना कमजोरी केलाएको छ । अध्यक्ष स्वयम्ले निर्वाचनमा पार्टीको पराजयको नैतिक जिम्मेवारी लिएर अब के गरेर जार्नुपर्छ भन्ने मार्गचित्र प्रस्तुत गर्नुभएको छ ’ रिजालले भने ‘यसमा उपाध्यक्ष पौडेल र महासचिव पोखरेलको व्याख्याबाट पार्टीका मुख्य नेताहरूबीचमा अविश्वासको बादल बिलाएर गएको छ । म समर्थन गर्दछु । ’

रिजालले वमपन्थी एकताका लागि तत्काल पहल लिन पनि पार्टीलाई सुझाव दिएका छन् । एमालेको नीति र नेतृत्वमा वामपन्थी एकता भए पुन कम्यूनिष्ट आन्दोलन जागृत हुन सक्ने उनले बताए ।

‘समग्र कम्युनिस्ट आन्दोलनको पुनर्गठनका लागि गम्भीरतापूर्वक बहस हुनुपर्छ । आजकै नारा, सिद्धान्त, रणनीति, कार्यनीति, कार्यशैली र सरकारदेखि सरकारसम्मको गोलचक्करप्रति नयाँ पुस्ता कत्ति पनि आकर्षित छैन ,’ रिजालले भने, ‘सापेक्षतामा हेरेर हिजो मदन भण्डारीले अनेक आरोप खेपेर चालेजस्तै साहसिक कदम आवश्यक छ । यसले फेरि एक कालखण्डका लागि हामीलाई पुनर्जीवन दिनेछ ।’

रिजालले पार्टीको प्रचारलाई प्रभावकारी बनाउन फिजिकल होइन, डिजिटल संयन्त्र बनाउनु पर्ने बताएका छन् । उनले पार्टी केन्द्रमा अलग्गै डिजिटल विभाग बनाएर २४ सै घण्टा नयाँ माध्यमबाट प्रचार गर्नुपर्ने बताए ।

पार्टीमा नयाँ पुस्ताको आकर्षण जरुरी रहेको रिजालले बताएका छन् । पार्टीप्रति घटेको नयाँ पुस्ताको आकर्षणबारे चिन्ता गर्दै रिजालले भने ‘पार्टीको पूर्णकालीन सदस्य हुने कतै मेरो पुस्ता नै अन्तिम हुने त होइन ? यस विषयमा गम्भीर हुन पार्टीका सबै तप्कालाई आग्रह गर्दछु । ’