काठमाडौँ– काठमाडौँ उपत्यकाको प्रसिद्ध सांस्कृतिक पर्व येँया (इन्द्रजात्रा)को विधिवत सुरुवातको अवसरमा हनुमानढोका दरबार क्षेत्रस्थित वसन्तपुरमा देवप्याखँ (देवी नाच) प्रदर्शन गरिएको छ ।

इन्द्रजात्राको पहिलो दिन अर्थात् भाद्र शुक्ल द्वादशीको बिहान ३६ हात लामो काठको लिङ्गो (योसिं) उठाउने क्रममा परम्परागत नेवारी देवी नाच प्रस्तुत गरिएको हो । सहभागी कलाकारले विभिन्न देवीदेवता र दैत्यको मुकुन्डो लगाएका थिए ।

धिमे र भुस्या बाजाको ऊर्जावान् तालमा गुञ्जिएको उक्त नाच हेर्न स्थानीय र विदेशी पर्यटकको भीड लागेको थियो । जात्राको मुख्य आकर्षण मानिने यो ऐतिहासिक नाच वसन्तपुरस्थित शिव–पार्वती मन्दिरको प्राङ्गणमा प्रदर्शन गरिएको हो ।

जात्रा सुरु हुनुभन्दा एक दिनअगाडि नै हनुमानढोका र मरु टोल आसपासमा इन्द्रजात्राको माहोलले सर्वसाधारणको भीड बढेको छ ।

तस्बिर : सुर्याम्स उप्रेती/नेपाल फोटो लाइब्रेरी