काठमाडौँ – जापानमा जारी २०औँ एसियाली खेलकुद (एसियाड) मा नेपालले पहिलो जित हात पारेको छ। बक्सिङतर्फ ६० केजी तौल समूहमा नेपाली मुक्केबाज खगेन्द्र रोका मगरले मकाउका एल्भिन जोन रेयेस सालिनासलाई पराजित गरेका हुन्।

निशिओ जिम्न्यासियममा बुधबार भएको प्रारम्भिक चरणको प्रतिस्पर्धामा खगेन्द्रले सालिनासलाई ५–० को एकपक्षीय स्कोरमा हराए। जारी एसियाडमा नेपाली खेलाडीले हात पारेको यो नै पहिलो जित हो।

यसैबीच नेपालले बुधबार विभिन्न सात खेलमा प्रतिस्पर्धा गर्दैछ। आजको मुख्य आकर्षण महिला कबड्डी टोलीको खेल रहेको छ। समूह ‘बी’ अन्तर्गत नेपालले चिनियाँ ताइपेईसँग प्रतिस्पर्धा गर्नेछ। खेल नेपाली समयअनुसार अपराह्न ४:३० बजे सुरु हुनेछ।

समूह ‘बी’ मा नेपालसँगै चिनियाँ ताइपेई, श्रीलङ्का र थाइल्यान्ड रहेका छन्। समूह चरणपछि शीर्ष दुई टोली सेमिफाइनलमा प्रवेश गर्नेछन्। नेपालले यसअघि समूहको पहिलो खेलमा थाइल्यान्डलाई हराइसकेको छ।

चीनको हाङ्झाउमा भएको १९औँ एसियाली खेलकुदमा नेपालको महिला कबड्डी टोलीले कास्य पदक जितेको थियो। त्यसैले यसपटक पनि टोलीबाट पदकको उच्च अपेक्षा गरिएको छ।

बुधबार कबड्डी र बक्सिङबाहेक नेपालले पौडी, कराते, स्क्वास, टेबलटेनिस र उसुमा पनि प्रतिस्पर्धा गर्दैछ। प्रतियोगितामा नेपालले अहिलेसम्म कुनै पदक जित्न सकेको छैन।

राष्ट्रिय खेलकुद परिषद्का सदस्यसचिव रामचरित्र मेहताका अनुसार यसपटक नेपालबाट २१ खेलका १३५ जना खेलाडीले सहभागिता जनाएका छन्।