काठमाडौं – जनताबाट रकम उठाएर चितवनमा रंगशाला बनाउने क्रममा ऋणमा डुबेपछि छोरीको उपचारको बाहानामा अमेरिका पलायन भएका कलाकार जोडी सीताराम कट्टेल ‘धुर्मुस’ र कुञ्जना घिमिरे ‘सुन्तली’ उतैबाट कलाकारितामा सक्रिय रहने भएका छन् ।

‘मेरी बास्सै’बाट चर्चित बनेको धुर्मुसको थेगो ‘म त मर्छु कि क्या हो’ नाम राखेर उनीहरूले सिरियल बनाउने भएका हुन् ।

धुर्मुसका अनुसार अमेरिकाको क्यारोलाइना राज्यको राले क्षेत्रलाई केन्द्र बनाएर यो सिरियल निर्माण गरिएको छ । यो सिरियल नेपाली समयअनुसार हरेक शुक्रबार साँझ ८ः१५ बाट युट्युबबाट सार्वजनिक हुनेछ ।

यस सिरियलमा उनीहरूसहित मोहन मिश्र, दिनेश कार्की, शंकरराज वाग्ले, संयम लामिछाने, मोनिका चौलागाईं, चुडा धिमाल, धर्म भारतीलगायत कलाकारको अभिनय देख्न सकिनेछ ।

यही सिरियलमार्फत सीताराम र कुञ्जनाले आफ्नी छोरी सुबिहानी कट्टेललाई पनि बाल कलाकारको रुपमा डेब्यू गराएका छन् ।

दर्शकसँग दूरी नबढोस् भन्ने उद्देश्यले अमेरिकाबाटै कलाकारितामा सक्रिय बन्ने प्रयासमा आफूहरू रहेको सीतारामले बताए ।

उनले भने, ‘मुख्य रूपमा अब दर्शकले हाम्रो सिरियल नियमित रूपमा हेर्न पाउनुहुनेछ । हामी जहाँ रहे पनि आफ्नो कला र सिर्जनालाई निरन्तरता दिन सकिन्छ भन्ने सन्देश दिन चाहन्छौँ ।’