काठमाडौं- सत्तारुढ राष्ट्रिय स्वतन्त्र पार्टीका सभापति रवि लामिछाने उत्तरी छिमेकी चीन जाने भएका छन् । उनी यही साउनमा चीन भ्रमणमा जाने भएका हुन् ।

रास्वपाका आफूनिकट केही नेता र सांसदसहित उनी बेइजिङ जान लागेका हुन् । भ्रमणका क्रममा उनले त्यहाँ चिनियाँ विदेशमन्त्री वाङ यीसहितका उच्च सरकारी अधिकारीलाई भेट्ने भएका छन् ।

भ्रमणका क्रममा भेट्ने अन्य अधिकारीबारे केही खुलाइएको छैन । रविनिकट स्रोतका अनुसार यो भ्रमणमा फागुन २१ को निर्वाचनपछि बदलिएको नेपालको राजनीतिक परिस्थितिअनुसार रविले विश्वासको वातावरण बनाउने प्रयास गर्नेछन् ।

रास्वपा सरकारमा आएयता प्रधानमन्त्री वालेन्द्र शाहले अझै पनि भारतीय र चिनियाँ राजदूतसँग संवाद गरेका छैनन् । दुई निकट छिमेकीसँग प्रधानमन्त्रीले संवाद गर्न नचाहेको अवस्थामा रविले नै पहलकदमी लिएका हुन् ।

‘सभापति नेतृत्वको टोली बेइजिङ जाने निश्चित भएको छ। यही साउनभित्रै भ्रमण हुनेछ । चार सदस्यीय टोलीसिहत जाने कुराको टुंगो भइसकेको छ’, स्रोत भन्छ, ‘तर टोलीमा को को हुन्छन्, खुलाइएको छैन ।’

यस भ्रमणमा विदेशमन्त्री वाङ यीसहितका अधिकारीसँग रविले नेपाल-चीन सम्बन्धबारे विस्तृत छलफल गर्ने भएका छन्। पछिल्लो समय नयाँ सरकार र दुई छिमेकीबीच संवादहीनताको अवस्था छ ।

तर वालेन्द्रले आफ्नो भारत भ्रमणका लागि भन्दै प्रमुख सल्लाहकार कुमार बेनलाई केही समयअघि नयाँ दिल्ली पठाएको खुलेको छ। बेनले त्यहाँ भारतीय प्रधानमन्त्री नरेन्द्र मोदीका राष्ट्रिय सुरक्षा सल्लाहकार अजित डोभाललाई भेटेको खुलेको छ। सरकारले सय दिन पूरा गरिसकेकाले अब बालेन निकट छिमेकीहरूको भ्रमणका लागि तयार हुँदैछन् ।

तर उनले अहिलेसम्म चीन र भारतका राजदूतसँग वान टु वान संवाद गरेको जानकारीमा आएको छैन । रवि बेइजिङ जाँदा चिनियाँ अधिकारीहरूसँगको भेटमा सरकारी प्रतिनिधि सहभागी नहुने बताइएको छ।

बालेनको भनाइलगत्तै भारतीय सञ्चारमाध्यले नेपाल–भारत सम्बन्धको व्याख्या गरिरहेका छन् । केही सञ्चारमाध्यमले बालेनवको भनाइबाट भारतलाई फाइदा पुग्ने भनेका छन्।

यही विवाद र तनावबीच लामिछाने सोमबार दिउँसो भारत भ्रमणमा निस्किएका छन्। उनको टोलीमा पत्नी निकिता पौडेल, स्वकीय सचिव अविनाश आचार्य, सह-महामन्त्री विपिन आचार्य तथा विदेश विभाग प्रमुख दीपक बोहरा छन्।

यसअघि जेठ १७ गते संसद्मा उभिएर वालेन्द्रले नेपालले पनि भारतीय भूमि अतिक्रमण गरेको भनेलगत्तै रवि भारत गएका थिए । बालेनले संसद्मा उभिएर विवादास्पद अभिव्यक्तिको भोलिपल्टै लामिछाने भारततिर लागेका थिए । त्यहाँ उनको भव्य स्वागत भएको थियो ।

रवि त्यसबेला भारतीय जनता पार्टीका अध्यक्ष नीतिन नवीनको निम्तो स्वीकारेर रवि भारततिर लागेका थिए । लामिछानेले त्यसबेला पत्नी निकिता पौडेल, स्वकीय सचिव अविनाश आचार्य, सह-महामन्त्री विपिन आचार्य तथा विदेश विभाग प्रमुख दीपक बोहरालाई नयाँ दिल्ली लगेका थिए ।

पाँचदिने भ्रमणका क्रममा उनले भारतीय प्रधानमन्त्री मोदी भाजपा अध्यक्ष नवीन, कूटनीतिक अधिकारीहरू र भारतस्थित नेपाली समुदायका प्रतिनिधिसँग भेटघाट गरेका थिए ।

कालापानी, लिपुलेक र लिम्पियाधुरासहितको सीमा विवाद र द्विपक्षीय सम्बन्धबारे संवेदनशील परिस्थिति बनेका बेला रवि भारत गएका थिए । त्यसअघि नै भारत र चीनले नेपाली भूमि लिपुलेकबाट व्यापारिक नाका खोल्ने सहमति गरिसकेका थिए ।