काठमाडौं– ई–पासपोर्ट (राहदानी) छपाइसँग सम्बन्धित अनियमितता प्रकरणमा अख्तियार दुरुपयोग अनुसन्धान आयोगले सोमबार विशेष अदालतमा मुद्दा दायर गरेको छ।

गत असार २ गते पक्राउ परेका राहदानी विभागका महानिर्देशक तीर्थराज अर्याल र निर्देशक सुनीलकुमार केसीसहित १८ जनाविरुद्ध भ्रष्टाचार मुद्दा चलाएको हो।

अख्तियारले गत असार २ गते अर्याललाई काठमाडौंबाट पक्राउ गरेको थियो। त्यसपछि जर्मन कम्पनी मुहलबाउरका नेपाली प्रतिनिधि मनिन्द्रराज मल्ल र राहदानी विभागका तत्कालीन लेखा अधिकृत तुलसीप्रसाद आचार्यलाई असार ३ गते पक्राउ गरिएको थियो।

राहदानी छपाइ तथा खरिद प्रक्रियामा भएको भनिएको अनियमितताबारे अख्तियारले छानबिन गरिरहेको थियो। अख्तियारले मुद्दा चलाएको पुष्टि भए पनि सजाय र बिगो मागदाबीबारे विस्तृत विवरण आइसकेको छैन।

भूलसुधार** : यसअघि यसै समाचारमा नेपाली कांग्रेसकी नेतृ एवम् पूर्वपराष्ट्रमन्त्री आरजु देउवाको पनि नाम पर्न गएकाले क्षमायाचनासहित सच्याएका छौँ। -सम्पादक