काठमाडौं – राष्ट्रिय स्वतन्त्र पार्टी (रास्वपा)को पहिलो महाधिवेशनअन्तर्गत हुने बन्दसत्र व्यवस्थापकीय तयारी पूरा गर्न समय लागेका कारण निर्धारित समयमा सुरु हुन सकेको छैन।

महाधिवेशन स्थलबाट सांसद रन्जु दर्शनाले दिएको जानकारी अनुसार प्रतिनिधिहरूको नामावली तथा अन्य व्यवस्थापकीय पक्ष मिलाउने काम जारी रहेकाले बन्दसत्र सुरु हुन केही ढिलाइ भएको हो। उनका अनुसार आवश्यक तयारी अन्तिम चरणमा पुगेको छ र बन्दसत्र छिट्टै सुरु हुने अपेक्षा गरिएको छ।

पार्टीका अन्य नेताहरूले पनि देशभरबाट आएका महाधिवेशन प्रतिनिधिहरूको विवरण प्रमाणीकरण तथा व्यवस्थापनका काम बाँकी रहेकाले बन्दसत्र केही समय पछि सारिएको बताएका छन्।

बन्दसत्रमा पार्टीको भावी नेतृत्व चयन, संगठनात्मक संरचना, विधान संशोधन तथा निर्वाचन प्रक्रियासम्बन्धी विषयमा विस्तृत छलफल हुने कार्यक्रम छ।