काठमाडौं- नेकपा एमालेको शुक्रबार बसेको सचिवालय बैठकमा पाँचजना उपाध्यक्षहरूले बोलेका छन् ।

अध्यक्ष केपी शर्मा ओलीको गुन्डुस्थित निवासमा बसेको यस बैठकमा पाँचजना उपाध्यक्षले मात्रै बोलिसकेका हुन् ।

यो बैठकबाट नेताहरूको कार्यविभाजनको टुंगो गरिने योजना थियो। गत सोमबार नै अध्यक्ष ओलीले कार्यविभाजन प्रस्ताव गरिसकेका छन् ।

बैठकमा सहभागी एकजना उपमहासचिवका अनुसार शनिबार बिहान ११ बजे बस्ने गरी बैठक सकिएको हो। शनिबारको बैठकमा अध्यक्ष ‌ओ‌लीसहित सचिवालयका अन्य १२ जनाले बोल्ने छन्।

शुक्रबारको बैठकमा पाँचजना उपाध्यक्ष रामबहादुर थापा ‘बादल’, विष्णु पौडेल, पृथ्वी सुब्बा गुरुङ, रघुजी पन्त र गोकर्ण बिष्टले आफ्नो विचार राखे ।

शनिबारको बैठकमा अध्यक्षसहित महासचिव, उपमहासचिव र सचिवसहित १२ जनाले बोल्ने छन्।

नेतृत्व छाड्न दबाब बढेकाा बेला अध्यक्ष ओलीले आफ्नो आलोचना र विरोधमा उत्रिँदै आएका केही शीर्ष नेतासहितलाई कारबाहीको तयारीसमेत गरेका छन् ।

ओलीले यही बैठकबाट मंसिर २०८२ मा भएको एघारौँ महाधिवेशनबाट निर्वाचित नेताहरूको वरीयता निर्धारण गराउँदैछन्।

अर्कातिर निर्वाचन समीक्षासहित विभिन्न विभागमा जिम्मेवारी पनि तोकिँदैछ। एमालेले संविधान संशोधनसम्बन्धी छलफलका लागि टोलीसमेत बनाउँदैछ ।