तेहरान– इरानी रेड क्रिसेन्ट सोसाइटी (आईआरसीएस) ले अमेरिका र इजरायलको हवाई हमलाका क्रममा घरको भग्नवाशेषमा पुरिएका ७२०० भन्दा बढीलाई जीवितै निकालेको ।

संगठनले पहिलोपटक उद्धार अभियानको भिडियो पनि सार्वजनिक गरेको छ।

आईआरसीएसले सामाजिक सञ्जलामा शेयर गरेको भिडियोमा आफ्ना उद्धारकर्मी र स्वयंसेवकहरूलाई ध्वस्त भवनहरूको भग्नवाशेषबाट मानिसहरूलाई निकाल्दै गरेको देखाइएको छ।

धेरैजसो मानिसहरू धुलोले ढाकिएका अवस्थामा देखिन्छन्, जसलाई स्ट्रेचर र हातको सहाराले बाहिर निकालिएको छ।

भिडियोमा धेरै अग्ला आवासीय भवनहरू पूरै भत्किएको देखिन्छ। बमबारीपछि धेरै क्षेत्रमा ठूलो स्तरको राहत र उद्धार अभियान सञ्चालन गर्नुपरेको थियो।
आईआरसीएसका अनुसार यो युद्ध फेब्रुअरी २८ देखि सुरु भएर अप्रिल ८ सम्म चलेको थियो। यस अवधिमा संगठनले निरन्तर उद्धार अभियान चलाएको थियो।

संगठनले सोसल मिडिया पोस्टमा भनेको छ, ‘युद्धका क्रममा आईआरसीएसका सहायता कार्यकर्ताहरूले भग्वाशेष मुनिबाट ७२०० भन्दा बढी मानिसहरूलाई जीवितै बचाए।’

आईआरसीएसले युद्धविराम लागू हुनुअघिसम्म प्रभावित क्षेत्रहरूमा राहत र उद्धार अभियान जारी रहेको जनाएको छ। संगठनका टोलीहरूले औषधि र मानवीय सहायता पनि उपलब्ध गराएका थिए।

रेड क्रिसेन्ट सोसाइटी इरानको प्रमुख मानवीय राहत एजेन्सी हो। यसले युद्ध, प्राकृतिक विपत्ति र आपतकालीन अवस्थामा उद्धार तथा चिकित्सा सहायता प्रदान गर्ने काम गर्छ।