उत्तरी होन्डुरसको बाजो अगुआन क्षेत्रमा रहेको पाम बगानमा भएको भीषण सामूहिक गोलीकाण्डमा कम्तीमा १९ जनाको मृत्यु भएको छ। लामो समयदेखि संगठित अपराध, लागूऔषध तस्करी र भूमिसम्बन्धी विवादका कारण तनावग्रस्त रहेको यस क्षेत्रमा भएको घटनाले देशको सुरक्षा अवस्थाबारे फेरि गम्भीर प्रश्न उठाएको छ।

अधिकारीहरूका अनुसार घटना बुधबार राति रिगोर्स क्षेत्रमा भएको हो। स्थानीय बासिन्दाहरूले रातभर निरन्तर गोलीबारीको आवाज सुनेको बताएका छन्। घटनास्थलमा १३ जनाको शव एउटा क्षेत्रमा र थप ६ जनाको शव अर्को स्थानमा फेला परेको अभियोजन पक्षले जनाएको छ।

यस क्षेत्रलाई लामो समयदेखि प्रतिद्वन्द्वी सशस्त्र समूह, लागूऔषध तस्कर र भूमि नियन्त्रणको संघर्षले प्रभावित बनाउँदै आएको छ। प्रारम्भिक अनुसन्धानमा यो घटना आपराधिक सञ्जालसँग सम्बन्धित भएको देखिए पनि स्पष्ट कारण भने खुल्न बाँकी छ।

स्थानीय सुरक्षाअधिकारीहरूले घटनामा उच्च क्षमताका हतियार प्रयोग गरिएको बताएका छन्। सुरक्षामन्त्रीले घटनास्थललाई “अत्यन्तै भयावह” भन्दै धेरैजसो व्यक्तिहरूको हत्या राइफल तथा सटगन प्रयोग गरेर गरिएको संकेत दिएका छन्।

पीडितमध्ये धेरै जना पाम बगानमा काम गर्ने किसान रहेको स्थानीय नेताहरूले बताएका छन्। उनीहरूका अनुसार स्थानीय समुदाय लामो समयदेखि सशस्त्र समूहको धम्की र त्रासमा बाँच्न बाध्य छ।

घटनापछि होन्डुरसको राष्ट्रिय विधायिकाले सुरक्षा सुधारसम्बन्धी नयाँ कानुन पारित गरेको छ, जसअन्तर्गत सेनालाई सार्वजनिक सुरक्षामा थप भूमिका दिने र संगठित अपराधविरुद्ध विशेष एकाइ गठन गर्ने व्यवस्था गरिएको छ।

राष्ट्रपति नासरी असफुराले देशमा बढ्दो संगठित अपराध नियन्त्रणका लागि कडा कदम चाल्ने प्रतिबद्धता व्यक्त गरेका छन्। उनले क्षेत्रीय रूपमा संयुक्त राज्य अमेरिकासँग सहकार्य बढाउने संकेत पनि दिएका छन् ।

यसैबीच, ल्याटिन अमेरिकामा लागूऔषध तस्करीविरुद्ध कडा नीति अपनाइरहेका अमेरिकी राष्ट्रपति डोनाल्ड ट्रम्पको सुरक्षा अभियानसँग सहकार्य गर्ने संकेत पनि होन्डुरस सरकारले दिएको छ।

बाजो अगुआन क्षेत्र बाजो अगुआन लामो समयदेखि पाम तेल उत्पादन, भूमि विवाद र सशस्त्र समूहहरूको प्रभावका कारण हिंसात्मक द्वन्द्वको केन्द्र बनेको छ। स्थानीय स्रोतका अनुसार यहाँका पाम बगानहरूमा आपराधिक समूहहरूको प्रभाव बढ्दै गएको छ।