काठमाडौं– नेकपा (एमाले) का उपाध्यक्ष विष्णु पौडेलले नेपालको कम्युनिष्ट आन्दोलनलाई नयाँ ढङ्गले पुनर्गठित गर्दै राष्ट्रिय राजनीतिको मुख्य शक्तिका रूपमा एमालेलाई स्थापित गर्ने बताएका छन् ।

कम्युनिष्ट पार्टीको स्थापना दिवसका अवसरमा आयोजित कार्यक्रममा बोल्दै उनले नेपालको कम्युनिष्ट आन्दोलनले आफ्नो इतिहासमै सबैभन्दा ठूलो धक्का हालैको निर्वाचनबाट बेहोर्नुपरेको उल्लेख गर्दै अब संगठन सुदृढीकरण र पुनर्गठन आवश्यक रहेको बताए ।

पार्टीभित्रका कुनै पनि प्रयासले आन्तरिक एकतालाई कमजोर बनाउन नसक्ने उनको भनाइ थियो।

त्यस्तै, एमालेका महासचिव शंकर पोखरेलले पार्टीलाई नयाँ जीवन दिन जनताको विश्वास जित्नु अनिवार्य रहेको बताए। एमाले नेतृत्वको सरकारले गरेका सकारात्मक कामहरू जनतासम्म प्रभावकारी रूपमा पुर्‍याउन नसक्दा चुनावी पराजय भोग्नुपरेको उनको भनाइ छ।

उनले अब सत्तामुखी होइन, जनतामुखी भएर समाज परिवर्तनको नेतृत्व गर्ने दाबी समेत गरे।