काठमाडौं– आसन्न प्रतिनिधिसभा निर्वाचनका लागि भक्तपुरका नेकपा एमाले उम्मेदवारहरूले आफ्नो चुनावी प्रतिबद्धता सार्वजनिक गरेका छन् ।  

आइतबार भक्तपुरमा पत्रकार सम्मेलन गर्दै भक्तपुर क्षेत्र नम्बर १ का एमाले उम्मेदवार सोम प्रसाद मिश्र र भक्तपुर क्षेत्र नम्बर २ का उम्मेदवार महेश बस्नेतले चुनावी प्रतिबद्धता सार्वजनिक गरेका हुन् । 

दुवै उम्मेदवारहरूले राष्ट्र र राष्ट्रियताको सवालमा पार्टीको स्पष्ट अडान जनतासामु राख्दै मुलुकमा सुशासन, जनजीविका, रोजगारीलाई सुनिश्चितता गर्ने प्रतिबद्धता जनाएका छन् ।

एमाले सचिव समेत रहेका उम्मेदवार बस्नेतले मुलुकमा वैदेशिक हस्तक्षेपलाई रोक्नु नै यस पटकको मुख्य एजेन्डा भएको बताए ।

उनले आगामी दिनमा कसैले पनि राष्ट्रघातक काम गर्न नपाउने गरी शासक नभई सेवकको रुपमा जनतामा जाने उल्लेख गरे । उनले भक्तपुरको सम्पदाको जगेर्ना र विकास गर्दै सांस्कृतिक र पर्यटकीय क्षेत्रको रुपमा अघि बढाइने बताए । 

त्यस्तै भक्तपुर क्षेत्र नम्बर १ का एमाले उम्मेदवार सोम प्रसाद मिश्रले भू उपयोगको वर्गीकरणमा जनताको भावनालाई समेट्नेगरि नीति बनाउने, संवैधानिक नियुक्तिलाई पारदर्शी बनाइने, भ्रष्टाचार र अनियमितताका कार्यहरूलाई निरुत्साहन गर्ने लगाएका एजेन्डाहरू प्रस्तुत गरेका छन् ।