काठमाडौं । संयुक्त राष्ट्रसंघको महासभामा युक्रेन युद्धबारे व्यापक छलफल हुने तयारी भइरहेका बेला मंगलबार राति रुस र युक्रेनले एकअर्काका पूर्वाधारलाई निसाना बनाउँदै आक्रमण गरेका छन् ।

युक्रेनमाथि मंगलबार भएका रुसी आक्रमणमा चारजनाको मृत्यु भएको छ भने विभिन्न स्थानमा विद्युत् आपूर्ति अवरुद्ध भएको युक्रेनी अधिकारीहरूले जनाएका छन् ।

दक्षिण–पूर्वी क्षेत्र निप्रोपेत्रोभस्कका गभर्नर ओलेक्सान्डर हान्झाले टेलिग्राममार्फत निप्रो, क्रिभी रिह र पाभ्लोह्राद सहरमा आक्रमण भएको थियो । आक्रमणमा एन्टी–सिप तथा ब्यालिस्टिक क्षेप्यास्त्र, चारवटा क्रुज क्षेप्यास्त्र र २१२ वटा ड्रोन प्रयोग गरिएको उनले बताए ।

निप्रोपेत्रोभस्क युक्रेनको प्रमुख औद्योगिक क्षेत्र हो । यहाँ स्टिल उत्पादन र मेसिन निर्माणलगायत ठूला उद्योगहरू छन् । निप्रो सहरमा चारजनाको मृत्यु हुनुका साथै ६ जना घाइते भएका छन् । 

यसैगरी युक्रेनले रुसी तेल प्रशोधन केन्द्रमा आक्रमण गरेको छ । रुसको सामारा क्षेत्रमा युक्रेनी ड्रोन आक्रमणमा एकजनाको मृत्यु भएको छ भने चारजना घाइते भएको स्थानीय अधिकारीहरूले बताएका छन् । सामारा तेल प्रशोधन केन्द्रसहितका महत्वपूर्ण औद्योगिक सुविधाका लागि परिचित क्षेत्र हो ।

रुसको रक्षा मन्त्रालयले रातभर देशका विभिन्न क्षेत्रमा २९७ वटा युक्रेनी ड्रोन निष्क्रिय पारेको जनाएको छ । सामारा रुसी राजधानी मस्कोबाट करिब १ हजार किलोमिटर दक्षिण–पूर्वमा अवस्थित छ ।