काठमाडौं– नेकपा एमालेका महासचिव शंकर पोखरेलले पार्टी अध्यक्ष केपी शर्मा ओलीसँग आफूले असहमति नराखेको बताएका छन् ।

मंगलबार ललितपुरको भनिमण्डला जारी केन्द्रीय कमिटीको बैठकमा आफ्नो धारणा राख्दै पोखरेलले अध्यक्ष केपी ओलीसँग काम गरिरहेको अवस्थामा आफूले अध्यक्षमाथि अभियोग नलगाउने स्पष्ट पारेका छन् ।

बहस नोट समितिका सदस्य सूर्य थापाका अनुसार पोखरेलले बैठकमा तीन महत्त्वपूर्ण धारणा राखेका छन् ।

पोखरेलले भनेका छन्, ‘सँगसँगै बसेर काम गरिरहँदा अध्यक्ष कमरेडलाई अभियोग लगाउने काम मबाट हुँदैन ।’

त्यस्तै, पार्टीमा असमझदारी र विग्रह आउने गरी आफूले विशेष महाधिवेशन आयोजनाको नेतृत्व नगर्ने उनको भनाइ छ ।

‘पार्टीमा असमझदारी र विग्रह आउने गरी मैले विशेष महाधिवेशन आयोजनाको नेतृत्व गर्दिनँ,’ पोखरेलले भनेका छन् ।

आफू पार्टी अध्यक्ष बन्ने विषयमा समेत पोखरेलले ओलीको असहमतिमा अध्यक्ष नबन्ने धारणा राखेका छन्। ‘तपाईँको असहमतिमा म पार्टीको अध्यक्ष बन्दिनँ,’ उनको भनाइ उद्धृत गर्दै थापाले लेखेका छन् ।

पोखरेलले अध्यक्ष ओलीसँग आफ्नो कुनै असहमति नरहेको समेत बताएका छन् । ‘पार्टी अध्यक्षसँग मेरो असहमति छँदै छैन, तपाईँलाई त्यस्तो अनुभूति छ भने भोलिको दिनदेखि नै हुनेछैन । यो विश्वास दिलाउन चाहन्छु,’ उनले भनेका छन् ।