न्युयोर्क– संयुक्त राष्ट्रसंघको ८१औँ महासभाका क्रममा परराष्ट्रमन्त्री शिशिर खनाल र जापानका विदेशमन्त्री मोटेगी तोसिमित्सुबीच द्विपक्षीय भेटवार्ता भएको छ। भेटमा नेपाल र जापानबीचको ७० वर्ष पुरानो कूटनीतिक सम्बन्धलाई आगामी दिनमा थप विस्तार तथा सुदृढ बनाउने विषयमा गहन छलफल भएको छ।

भेटका क्रममा जापानी विदेशमन्त्री मोटेगीले नेपालमा हालै आएको विनाशकारी बाढीबाट भएको जनधनको क्षतिप्रति गहिरो दुःख व्यक्त गर्दै शोकसन्तप्त परिवार र प्रभावितहरूमा समवेदना प्रकट गरेका छन् । उनले विपद्को आपत्कालीन उद्धारदेखि मध्यम र दीर्घकालीन पुनरुत्थानका चरणसम्म जापान सरकार नेपालको साथमा रहने र सहयोग जारी राख्ने प्रतिबद्धता व्यक्त गरेका छन्।

प्रतिक्रियामा परराष्ट्रमन्त्री खनालले जापान सरकार र जापानी जनताले देखाएको ऐक्यबद्धताप्रति हार्दिक धन्यवाद व्यक्त गरे। साथै बाढीमा परेर बेपत्ता भएका जापानी नागरिकसहित अन्य विदेशीको खोज तथा उद्धारका लागि नेपाल सरकारले कुनै कसर बाँकी नराख्ने जानकारी गराए।

विदेशमन्त्री मोटेगीले आगामी नोभेम्बरमा काठमाडौँमा आयोजना हुने ‘नेपाल–जापान फेस्टिभल’ ले दुई देशबीचको जनस्तरको सम्बन्धलाई अझ प्रगाढ बनाउने विश्वास व्यक्त गर्दै प्रधानमन्त्री वालेन्द्र शाह नेतृत्वको सरकारसँग विकास साझेदारी निरन्तर रहने स्पष्ट पारे। परराष्ट्रमन्त्री खनालले पनि नेपाल जापानसँगको द्विपक्षीय सम्बन्धलाई नयाँ उचाइमा पुर्‍याउन इच्छुक रहेको बताएको उनको निजी सचिवालयले जनाएको छ ।