काठमाडौँ – प्रतिनिधि सभाको बैठकको निर्धारित कार्यसूची आकस्मिक रूपमा परिवर्तन गरिएको छ। राष्ट्रिय स्वतन्त्र पार्टी (रास्वपा) का सचेतक प्रकाशचन्द्र परियारका अनुसार आजका लागि तय गरिएका पुराना कार्यसूचीहरू हटाई नयाँ विषय समावेश गरिएको हो।

परिमार्जित कार्यसूची अनुसार बैठकमा “संयुक्त राष्ट्र सङ्घीय सामुद्रिक कानुन सम्बन्धी महासन्धि अन्तर्गतको राष्ट्रिय क्षेत्राधिकारभन्दा बाहिरका क्षेत्रका सामुद्रिक जैविक विविधताको संरक्षण र दिगो प्रयोग सम्बन्धी सम्झौता” माथि छलफल र अनुमोदनको प्रस्ताव अघि बढाउने तयारी छ।

संसद् सचिवालयले विशेष कारणवश पहिले तोकिएका विषयहरू हटाई सामुद्रिक जैविक विविधता सम्बन्धी यो महत्त्वपूर्ण अन्तर्राष्ट्रिय सम्झौतालाई प्राथमिकतामा राखी कार्यसूची संशोधन गरेको जनाएको छ।