काठमाडौं- निजी भ्रमणका क्रममा मुस्ताङ यात्रामा रहेका प्रधानमन्त्री वालेन्द्र शाह (बालेन) को सवारी म्याग्दीको अन्नपूर्ण गाउँपालिका–३ स्थित रुप्से झरनाबाट अगाडि बढेको छ ।

मुस्ताङ आउजाउ गर्ने पर्यटक यो झरनामा फोटो/भिडियो खिचेर यात्रा अघि बढाउँछन् । प्रधानमन्त्री बालेन र उनको टिम झरनामा नरोकिई सिधै मुस्ताङ सदरमुकाम जोमसोमतर्फ लागेको छ । म्याग्दीको तातोपानीस्थित होटेल न्याचुरल स्प्रिङमा एक घण्टा विश्रामपछि प्रधानमन्त्री बालेन जोमसोमतर्फ अघि बढेका हुन् ।

मुस्ताङ जाने सडक म्याग्दीको बेनी-जोमसोम खण्डमा दुई ठाउँमा पहिरो खसेर अवरूद्ध भएको थियो । म्याग्दीको अन्नपूर्ण गाउँपालिका–३ सुकेबगर र म्याग्दीकै रघुगंगा गाउँपालिका–२ बैसरीमा लेदोसहित पहिरो खस्दा उनको यात्रा अन्यौलमा परेको थियो । यद्यपि दुबै पहिरो हटाएर बाटो सुचारु गरिएको छ ।

सडक मार्गबाट मुस्ताङ यात्रा गर्ने क्रममा उनी हिजो पोखरा पुगेका थिए । पोखरानजिकैको अस्ताम गाउँस्थित अन्नपूर्ण इको भिलेज रिसोर्टमा बास बसेर प्रधानमन्त्री शाह शनिबार मुस्ताङतर्फ लागेका हुन् । प्रधानमन्त्री शाहको मुस्ताङ यात्राले त्यहाँको पर्यटकीय गन्तव्यको प्रचार भई पर्यटकहरुको आगमन बढ्ने अपेक्षा गरिएको छ ।