बागलुङ– बागलुङको जैमिनी नगरपालिका–१० राङ्खानीस्थित आदानप्रदान कृषि सहकारी संस्था लिमिटेड ले स्थानीय किसानले उत्पादन गर्ने कोदो र फापरको पिठोलाई ब्रान्डिङ, लेबलिङ र प्याकेजिङ गरी बजारमा बिक्री–वितरण सुरु गरेको छ।

सहकारीले किसानबाट संकलन गरिएको कोदो र फापरलाई प्रशोधन गरी गुणस्तरीय प्याकेजिङसहित बजारमा ल्याएको सहकारीका अध्यक्ष नन्दलाल पाध्यायले जानकारी दिए। उनका अनुसार जिल्ला कृषि विकास कार्यालयको ७५ प्रतिशत अनुदानमा आवश्यक उपकरण प्राप्त भएपछि सहकारीले आधुनिक ढंगबाट प्रशोधन, लेबलिङ र प्याकेजिङको काम अघि बढाएको हो।

अध्यक्ष पाध्यायले स्थानीय उत्पादनको बजारीकरण गर्दै किसानलाई आयआर्जनसँग जोड्ने उद्देश्यले पिठोको ब्रान्डिङ गरिएको बताए। सहकारीले फापरको पिठो प्रतिकिलो २६० र कोदोको पिठो प्रतिकिलो १६० मा बिक्री गर्ने मूल्य निर्धारण गरेको छ।

सहकारीले पहिलो चरणमा ५० किलोग्राम कच्चा पदार्थबाट पिठो उत्पादन, प्रशोधन तथा प्याकेजिङ सुरु गरेको जनाएको छ। उक्त कार्यमा सहकारीका दुई कर्मचारीसँगै पदाधिकारी र सदस्यहरू पनि सक्रिय रूपमा संलग्न रहेका छन्।

कोदो र फापर खेतीको उत्पादन अवस्था तथा बजारको मागका आधारमा आगामी दिनमा उत्पादन विस्तार गर्ने योजना रहेको अध्यक्ष पाध्यायले बताउनुभयो।

उनका अनुसार बजारमा उपलब्ध अन्य तयारी खाद्य सामग्रीको तुलनामा स्थानीय उत्पादनको लागत बढी पर्ने भएकाले बजार व्यवस्थापन प्रमुख चुनौती बनेको छ। तथापि स्वादिष्ट, पौष्टिक र स्वास्थ्यवर्द्धक भएकाले स्थानीय उत्पादनप्रति उपभोक्ताको आकर्षण बढ्दै जाने विश्वास सहकारीले लिएको छ।