काठमाडौं– पछिल्लो २४ घण्टामा देशभर ४७ वटा विपद्जन्य घटना भएका छन् । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको दैनिक विपद् बुलेटिन अनुसार घटनामा परी ३ जनाको मृत्यु भएको छ भने १ जना बेपत्ता र ८ जना घाइते भएका छन् ।

प्राधिकरणका अनुसार सबैभन्दा बढी १९ वटा पहिरोका घटना भएका छन् । यस्तै ९ वटा आगलागी, ८ वटा सर्पदंश, ३ वटा वन्यजन्तु आक्रमण, २ वटा बाढी र १–१ वटा चट्याङ तथा हावाहुरीका घटना भएका छन् ।

विपद्का घटनाबाट ३०२ परिवार प्रभावित भएका छन् । साथै १५ वटा चौपाया क्षति भएको र ७ स्थानमा सडक अवरुद्ध भएको बुलेटिनमा उल्लेख छ । घटनाका कारण करिब ३३ लाख १० हजार रुपैयाँ बराबरको अनुमानित आर्थिक क्षति भएको प्राधिकरणले जनाएको छ ।

प्रभावित जिल्लाको संख्या ४४ रहेको छ । सर्पदंशका घटनाले ८ जिल्ला प्रभावित भएका छन् भने पहिरोका घटनाले १४ जिल्लामा असर पुर्‍याएको छ । मनसुन सक्रिय रहेकाले प्राधिकरणले बाढी, पहिरो तथा अन्य विपद्जन्य जोखिमबाट सतर्क रहन सर्वसाधारणलाई आग्रह गरेको छ ।