काठमाडौं– प्रदेशको सत्ता समीकरण अगाडि बढाउन नेपाली कम्युनिस्ट पार्टीका संयोजक पुष्पकमल दाहाल प्रचण्ड र नेकपा एमालेका अध्यक्ष केपी शर्मा ओलीले निकटहरूसँग छुट्टाछुट्टै छलफल थालेका छन् ।  

दुई नेताहरूबीच मंगलबार करिब दुई घण्टा लामो संवादपछि सत्ता सहकार्यका लागि अघि बढ्न सक्ने संकेत देखिएको छ । 

तर अगाडि बढ्न निश्चित मापदण्ड मोडालिटी र सहकार्यको पूरै सम्भावना भइनसकेको प्रचण्डनिकट एकजना नेता बताउँछन् । 

दुवैजना नेताले सत्ता सहकार्यका लागि ढोका खुल्ला भएको तर प्रारम्भिक छलफलपछि फेरि जुट्ने भन्दै मंगलबारको वार्ता सकाएका थिए । 

एमाले अध्यक्ष ओलीका सचिवालय सदस्य निरू पालका अनुसार दुई नेताहरूबीच संवादका लागि ढोका खुल्ला भएको छ ।

‘हिजोको भेटले संवादका लागि ढोका खुल्ला भएको संकेत दिएको छ। अरू विषयमा आफआफ्नो नेताहरुसँग छलफल गरेपछि केही आउला’,  पालले भनिन्, ‘नेताहरू बीचमा पछिल्लो राजनीतिक घटनाक्रम र सहकार्य लगायतका विषयमा छलफल भएको थियो।’

छलफलपछि प्रचण्ड मधेश झरेका छन् । उनले आफूनिकट नेताहरूसँग त्यहीँबाट पनि अनौपचारिक रुपमा छलफल गरिरहेका छन् । 

ओलीले गुण्डुमै आफूनिकट नेताहरूसँग छलफल गरिरहेका छन्। वाम गठबन्धन मिलाउन ओली पक्षबाट महेश बस्नेत महत्त्वपूर्ण भूमिकामा देखिएका छन् । प्रचण्ड पक्षबाट प्रकाश ज्वाला र वर्षमान पुन लगायत नेताहरू छन् ।