काठमाडौँ – नेकपा एमाले बागमती प्रदेश सरकारबाट बाहिरिएको छ। बागमती प्रदेश संसदीय दलका नेता जगन्नाथ थपलियाका अनुसार मङ्गलबारदेखि नै एमाले सरकारबाट बाहिरिने निर्णय भएको हो।

सरकारबाट बाहिरिएसँगै एमालेका तर्फबाट प्रदेश सरकारमा सहभागी मन्त्रीहरूले आज (बुधबार) मुख्यमन्त्रीसमक्ष आफ्नो राजीनामा बुझाउँदै छन्।

संसदीय दलका नेता थपलियाले अब मिल्न सक्ने राजनीतिक शक्तिसँग सहकार्य गरेर नयाँ सरकार गठन गरिने जानकारी दिए। उनले नेकपासँग नयाँ सत्ता सहकार्य हुने दाबीसमेत गरेका छन्।

यसअघि मङ्गलबार एमाले अध्यक्ष केपी शर्मा ओली र नेकपाका संयोजक पुष्पकमल दाहाल ‘प्रचण्ड’ बीच ओलीनिवास भक्तपुरमा समसामयिक राजनीतिक विषय र सत्ता समीकरणबारे छलफल भएको थियो। उक्त शीर्ष भेटवार्तालगत्तै बागमती प्रदेशमा यो नयाँ राजनीतिक घटनाक्रम विकसित भएको हो।