काठमाडौं- राष्ट्रिय स्वतन्त्र पार्टीका सभापति रवि लामिछानेले फागुन २१ को चुनावअघि नै वरिष्ठ नेता वालेन्द्र शाहको खुट्टामा आफूले बल थमाएको बताएका छन् ।

आइतबार पार्टीको पहिलो महाधिवेशन उद्घाटन समारोहलाई चितवनको भरतपुरमा सम्बोधनका क्रममा उनले बालेन अब सरकारमा भएकाले उनले भटाभट गोल हान्नुपर्ने बताए ।

‘अहिले बालेनको खुट्टामा बल छ, अब उनले भटाभट गोल हान्‍नुपर्छ’, उनले भने, ‘अब बालेनले भटाभट गोल हान्ने छन् । झुक्किएर अन्य खुट्टामा बल आएछ भने मैले त्यही खुट्टामा पास गर्ने जिम्मा पनि मेरो हो ।’

उनले अहिले रास्वपाको सरकार भएकाले बेला यसलाई लडाउन धेरैले मुख मिठ्याइरहेको पनि बताए । ‘यहाँ मुख मिठ्याउने धेरै छन् । चुक्ली लगाइदिने पनि धेरै छन्’, उनले भने, ‘हामी इतिहास लेख्न आएका हौँ । यदि हामी असफल भयौँ भने हामीलाई इतिहासले प्रश्न गर्नेछ। त्यसैले हामी इतिहासले प्रश्न नगर्ने गरी देश बनाउने अभिभार पूरा गर्न आएका हौँ ।’