चितवन- नेपाली कांग्रेसका सभापति गगनुकमार थापाले राष्ट्रिय स्वतन्त्र पार्टी (रास्वपा) को पहिलो महाधिवेशनस्थलमा पुगेर विगतका राजनीतिक गल्तीहरू सम्झिएका छन्।

उनले विगतमा निर्वाचन जित्ने र सत्तामा पुग्ने लक्ष्यमा केन्द्रित हुँदा राजनीतिक दलहरूले जनअपेक्षा अनुसार काम गर्न नसकेको स्वीकारेका हुन् ।

उद्घाटन समारोहलाई सम्बोधन गर्दै थापाले इतिहासप्रति गर्व भए पनि पछिल्ला वर्षहरूमा आफ्नै पार्टी संलग्न केही निर्णयहरूले आफूलाई आत्मआलोचना गर्न बाध्य बनाएको बताए।

‘म पार्टी कार्यालय जाँदा जननेता बीपी कोइरालालाई सम्झन्छु र इतिहासमा गर्व गर्छु। तर पछिल्ला १० वर्षमा मेरो पार्टी पनि संलग्न भएर गरेका कतिपय निर्णयले मेरो शिर निहुरिन्छ,’ उनले भने।

थापाले पछिल्ला वर्षहरूमा निर्वाचन जित्ने, सरकारमा पुग्ने र शक्ति हासिल गर्ने उद्देश्यले गठबन्धन र भागबण्डाको राजनीति गरिएको स्वीकार गरे।

‘सरकारमा पुगेर शक्ति चाहिन्छ, त्यो शक्ति घरपरिवार र आफ्नाका लागि प्रयोग गर्ने गल्ती गर्‍यौं। यो गल्ती भएकै हो,’ उनले भने।

उनले रास्वपासँग सिक्नुपर्ने धेरै कुरा रहेको उल्लेख गर्दै कांग्रेस पनि आत्मसुधारको प्रक्रियामा रहेको बताए। ‘हामी तपाईंहरूबाट धेरै कुरा सिक्ने हो। म सिक्छु, मेरो पार्टीले पनि सिक्न चाहन्छ,’ उनले भने।

यसका साथै, थापाले विगतका उपलब्धिहरूलाई पूर्ण रूपमा अस्वीकार नगर्न र लोकतन्त्रका लागि भएका संघर्षहरूको सम्मान गर्न आग्रह गरे।

उनले ३५ वर्षको लोकतान्त्रिक अभ्यासमा केही पनि नभएको निष्कर्षमा नपुग्न आग्रह गर्दै पञ्चायतविरुद्धको संघर्ष र त्यस क्रममा भएका बलिदानको स्मरण गराए।

’विगत खराब थियो भन्दैमा ३५ वर्षमा केही भएन भनेर नभन्दिनुहोला। पञ्चायतका ३० वर्षविरुद्धको संघर्षलाई कमजोर नबनाइदिनुहोला,’ उनले भने।

रास्वपाका प्रतिनिधि तथा कार्यकर्तालाई सम्बोधन गर्दै थापाले लोकतन्त्र र राजनीतिक परिवर्तनका लागि धेरै नागरिकले बलिदान दिएको स्मरण गराउँदै वर्तमान राजनीतिक उपलब्धिहरू त्यही संघर्षको जगमा निर्माण भएको बताए।