काठमाडौं- नर्वेमा गुप्तचरी गर्न खोजेको आशंकामा एक चिनियाँ नागरिकलाई पक्राउ गरिएको छ । यसै महिना नर्वेमा चिनियाँ नागरिक पक्राउ परेको यो दोस्रो घटना हो ।

नर्वेको आन्तरिक सुरक्षा निकाय (पीएसटी) का प्रवक्ता एइरिक वेउमका अनुसार ती व्यक्तिमाथि नोर्डल्यान्ड क्षेत्रमा गैरकानुनी जासुसी गतिविधि गर्न खोजेको आशंका गरिएको छ । उनका वकिलहरूले भने यी आरोपहरूलाई अस्वीकार गरेका छन् । अदालतले उनलाई चार हप्ताका लागि हिरासतमा राख्न अनुमति दिएको छ ।

यसअघि यही महिना एक चिनियाँ महिलालाई पनि पक्राउ गरिएको थियो । उनीमाथि नर्वेमा दर्ता भएको एउटा कम्पनीलाई आवरणका रूपमा प्रयोग गरेकी थिइन् ।

नर्वेका गुप्तचर एजेन्सीहरूले चीन र रुसलाई आफ्नो देशको मुख्य सुरक्षा खतराका रूपमा औँल्याउँदै आएका छन् । सन् २०२४ को राष्ट्रिय जोखिम मूल्याङ्कन प्रतिवेदन अनुसार रुसी र चिनियाँ जासुसी एजेन्सीहरूले नर्वेको भूमिमा विभिन्न माध्यमबाट चुनौती खडा गरिरहेका छन् ।