काठमाडौं- स्वीडेन र भारतबीच आगामी पाँच वर्षभित्र आपसी व्यापार र लगानीलाई दोब्बर बनाउने उद्देश्यका साथ रणनीतिक साझेदारी सम्झौता भएको छ । स्वीडेनका प्रधानमन्त्री उल्फ क्रिस्टर्सन र भारतीय प्रधानमन्त्री नरेन्द्र मोदीबीच भएको भेटवार्तापछि यसको घोषणा गरिएको हो ।

भारतीय प्रधानमन्त्री मोदी र युरोपेली संघ (ईयू) की प्रमुख उर्सुला भोन डेर लेयनसमेत सहभागी भएको पत्रकार सम्मेलनमा स्वीडेनी प्रधानमन्त्री क्रिस्टर्सनले यो नयाँ सम्झौता भारत र युरोपेली संघबीच गत जनवरीमा भएको स्वतन्त्र व्यापार सम्झौताको पृष्ठभूमिमा आएको बताए ।

उनले अहिलेकै गतिमा अघि बढे आगामी पाँच वर्षभित्रै द्विपक्षीय व्यापार र लगानी दोब्बर बनाउने साझा लक्ष्य रहेको र यो लक्ष्य तय गरिएको समयभन्दा अगावै पूरा हुन सक्ने विश्वास व्यक्त गरे । हाल यी दुई देशबीचको वार्षिक व्यापार ७.७५ अर्ब डलर रहेको छ ।

पत्रकार सम्मेलनमा बोल्दै भारतीय प्रधानमन्त्री मोदीले यस साझेदारी अन्तर्गत हरित रूपान्तरण, रक्षा, उदीयमान प्रविधि र जनता-जनताबीचको सम्बन्धजस्ता महत्त्वपूर्ण पक्षहरूलाई अगाडि बढाइने बताए । यसका साथै दुवै देशले सुरक्षा, प्रविधि, आर्टिफिसियल इन्टेलिजेन्स (एआई) र अन्तरिक्ष प्रविधिका क्षेत्रमा पनि सम्बन्ध विस्तार गर्न चाहेका छन् ।

यसै सिलसिलामा शुक्र ग्रह मिसन (भेनस अर्बिटर मिसन) को एक हिस्साका रूपमा सँगै काम गर्नका लागि दुई देशका अन्तरिक्ष एजेन्सीहरूबीच एक समझदारी पत्रमा हस्ताक्षर समेत भइसकेको छ ।