काठमाडौं- पाकिस्तानको सिन्ध प्रान्तमा मङ्कीपक्सका दुई नयाँ संक्रमित फेला परेपछि यस वर्ष प्रान्तभर संक्रमितको सङ्ख्या २५ पुगेको छ। स्वास्थ्य विभागका अनुसार मंगलबार कराँची र खैरपुरमा एक-एक जना नयाँ बिरामी भेटिएका हुन्। यस वर्ष सिन्ध प्रान्तमा मङ्कीपक्सका कारण हालसम्म ९ जनाको मृत्यु भइसकेको छ।

अधिकारीहरूका अनुसार अहिले खैरपुर यस संक्रमणको मुख्य केन्द्र बनेको छ, जहाँ १८ जना संक्रमित फेला परेका छन्। यसैगरी कराँचीमा ४ र सुक्कुरमा ३ जनामा संक्रमण पुष्टि भएको छ।

सुरुमा विदेशबाट आउनेहरूमा मात्र देखिएको यो रोग अहिले स्थानीयस्तरमै फैलिन थालेको पाइएको छ। स्वास्थ्य विभागले हालसम्म १२२ जना संदिग्ध बिरामीको परीक्षण गरिसकेको छ।

यसअघि खैरपुरका दुई अस्पतालमा केही नवजात शिशुहरूमा संक्रमण देखिएपछि ती अस्पतालका युनिटहरू सिल गरिएको थियो । सरकारले मङ्कीपक्सकै कारण नभई कुपोषण र कमजोरीका कारण पाँच बालबालिकाको मृत्यु भएको स्पष्टीकरण दिएको छ । हाल कराँचीमा भेटिएका नयाँ संक्रमितको अवस्था स्थिर रहेको र उनको सरुवा रोग अस्पतालमा उपचार भइरहेको छ।