काठमाडौं – नेपाल विद्यार्थी संघले गृहमन्त्री सुधन गुरुङको विषयलाई लिएर गम्भीर प्रश्न उठाउँदै तत्काल राजीनामाको माग गरेको छ।

संघले जारी गरेको विज्ञप्तिमा सम्पत्ति शुद्धीकरणसम्बन्धी कसुरमा पक्राउ परेका एक व्यवसायीसँग गृहमन्त्रीको व्यापारिक साझेदारी रहेको, साथै २०८२ चैत २९ मा सार्वजनिक गरिएको सम्पत्ति विवरणमा ‘जेन–जी आन्दोलन’पछि खरिद गरिएको सेयर नखुलाइएको आरोप लगाइएको छ। ती सम्पत्तिको स्रोत सार्वजनिक गर्न, सत्यतथ्य स्पष्ट पार्न र निष्पक्ष अनुसन्धानका लागि राजीनामा दिन संघले माग गरेको छ।

त्यसैगरी, पेट्रोलियम पदार्थको मूल्यवृद्धि, महँगी तथा सुशासनको पक्षमा शान्तिपूर्ण प्रदर्शन गरिरहेका विद्यार्थी नेताहरूको पक्राउप्रति संघले आपत्ति जनाएको छ। पक्राउ पर्नेहरूमा केन्द्रीय सदस्य भुवन भट्ट, सिटिईभिटि अध्यक्ष कुम्मराज देउवा तथा विद्यार्थी नेता नवीन बिष्ट, आकाश देवकोटा, सुशील ऐडी र विशाल बिसी रहेका छन् ।

संघले शान्तिपूर्ण आन्दोलनमा सहभागी सबै विद्यार्थी नेताहरूलाई बिना शर्त तत्काल रिहा गर्न सरकारसँग माग गरेको छ। अन्यथा, थप सशक्त आन्दोलनका कार्यक्रम अघि बढाइने चेतावनी पनि विज्ञप्तिमार्फत दिइएको छ।

उक्त विषयमा जानकारी गराउँदै संघका का।बा। सभापति नविन पौडेलले विद्यार्थी आन्दोलन लोकतन्त्रको आधार भएको उल्लेख गरेका छन् ।