काठमाडौं- अमेरिकी नौसेनाले इरानको अर्को पानीजहाज नियन्त्रणमा लिएको छ । हिन्द महासागरमा श्रीलंकाको तटनजिकै अमेरिकी नौसेनाले मंगलबार टिफानी नाम गरेको तेल बोक्ने ट्याङ्कर जहाज नियन्त्रणमा लिएको हो ।

अमेरिकी राष्ट्रपति डोनाल्ड ट्रम्पले घटनाको पुष्टि गर्दै कुनै घटनाबिनै उक्त जहाज नियन्त्रणमा लिइएको जनाएका छन् । अफ्रिकी मुलुक बोत्सवानाको ध्वजावाहक उक्त जहाज सिंगापुरका लागि प्रस्थान गरेको जनाइएको छ ।

अमेरिकाले प्रतिबन्ध लगाएको उक्त जहाजमा २० लाख ब्यारेल तेल रहेको समाचार संस्था रोयटर्सले जनाएको छ ।

केही दिनअघि पनि अमेरिकाले ओमानको खाडी क्षेत्रबाट तोउस्का नामक इरानी जहाजमाथि गोली प्रहार गरी नियन्त्रणमा लिएको थियो ।

अमेरिका र इरानबीच पाकिस्तानको राजधानी इस्लामावादमा हुने भनिएको शान्ति वार्ता अनिश्चित भएका बेला अमेरिकी नौसेनाले इरानी ट्याङ्कर नियन्त्रणमा लिएको हो ।