काठमाडौं– वर्षा र सहकालका देवता मानिने रातो मत्स्येन्द्रनाथको रथयात्रा मंगलबारदेखि सुरु भएको छ ।

मंगलबार ललितपुरको पुल्चोकमा रहेको रथलाई तानेर गाःबहालमा पुर्‍याइएको छ ।  रथ तान्नुअगाडि गुरुज्यूको पल्टनले सलामी दिनुका साथै विभिन्न टोलमा रहेका बाजागाजा समूहले रथको अघिपछि बसेर पुलचोकदेखि गाःबहालसम्म पुर्‍याउने परम्परा छ ।

साइतअनुसार रथ तान्न शुरु गरी विभिन्न रुटमा गाःबहालबाट फेरि मंगलबजार, सुनधारा, चक्रवहिल हुँदै लगनखेलको थटीटोलमा पुर्‍याइन्छ ।

थटीटोलमा नरिवल खसाल्ने जात्रा सकिएको केहि दिनपछि ज्योतिषले रातो मत्स्येन्द्रनाथलाई जावलाखेल लैजाने साइत हेर्ने परम्परा छ । मणिमण्डपस्थित सोह्रखुट्टे पाटीमा बसी मत्स्येन्द्रनाथका ज्योतिषले जावलाखेल लैजाने साइत निकाल्ने गर्छन् ।

रथ जावलाखेल पुगेको चार दिनपछि भोटो जात्रा मनाइन्छ । जात्रा भोटो देखाउने जात्रापछि बाजागाजाका साथ मत्स्येन्द्रनाथलाई बुङ्गमति लगिएपछि यस वर्षको जात्रा सम्पन्न भएको मानिन्छ ।

उपत्यकाकै सबैभन्दा लामो जात्राका रूपमा रहेको रातो मच्छिन्द्रनाथको रथयात्रा वैशाख महिनाको शुक्ल पक्ष प्रतिपदा देखि सुरु भएर असार शुक्ल चौथीसम्म करिब दुई महिनासम्म मनाइन्छ । १२ वर्षसम्म अनिकाल लागेपछि तत्कालीन राजा नरेन्द्र देवले यो जात्राको सुरुवात गराइएको किंवदन्ती छ ।