काठमाडौं– जेन-जी मुभमेन्ट, नेपालले गृहमन्त्री सुधन गुरुङलाई तत्काल पदबाट बर्खास्त गरी पक्राउ गर्न माग गर्दै प्रहरी प्रधान कार्यालय नक्सालमा औपचारिक निवेदन दर्ता गरेको छ।

संगठनका प्रवक्ता विजय शाहले निवेदनमा गृहमन्त्रीबारे गम्भीर आरोप सार्वजनिक भएको भन्दै उनी पदमा रहँदा निष्पक्ष अनुसन्धान प्रभावित हुने ‘कन्फ्लिक्ट अफ इन्ट्रेस्ट’ को अवस्था सिर्जना भएको दाबी गरेका छन् ।

निवेदनमा मुलुकी फौजदारी संहिताको आधार उल्लेख गर्दै गम्भीर आरोप लागेका व्यक्तिलाई आवश्यक परे पक्राउ गरी अनुसन्धान अघि बढाउन सकिने कानुनी व्यवस्था रहेको उल्लेख गरिएको छ।

त्यस्तै, पदमा रहेर अनुसन्धानमा प्रभाव पार्ने कार्य “सबुत नष्ट गर्ने वा अनुसन्धान अवरोध गर्ने अपराध” अन्तर्गत पर्न सक्ने दाबी पनि गरिएको छ।

राजनीतिक आधारमा आन्दोलनको दुरुपयोग, आर्थिक लाभ, तथा गैरकानुनी गतिविधिमा संलग्न भएको आरोपसमेत लगाइएको छ। साथै आन्दोलनका क्रममा भएको क्षति र शहीदहरूप्रति अपमान भएको दाबी पनि गरिएको छ।

निवेदनमार्फत जेन-जी मुभमेन्टले गृहमन्त्रीलाई पदबाट हटाउन सरकारलाई सिफारिस गर्न, तत्काल पक्राउ गर्न, निष्पक्ष अनुसन्धान अघि बढाउन र अनुसन्धान प्रतिवेदन सार्वजनिक गर्न माग गरेको छ।