काठमाडौं – बलिउड नायिकाको सफल करिअरपछि कमेडी शो ‘द कपिल शर्मा शो’को जज बनेकी अर्चना पुरन सिंहले अभिनयबारेको असन्तुष्टि खुलाएकी छन् ।

कपिलको शोले आफ्नो अभिनय करिअरलाई प्रभावित बनाएको उनले अभिव्यक्ति दिएकी छन् । अहिले मेकरहरूले आफूलाई कामको प्रस्ताव नै नगर्ने अवस्था आएको उनले बताएकी छन् ।

यस शोका कारण आफूले थुप्रै फिल्महरू छोड्न परेको समेत उनको दाबी छ ।

अर्चनाले एक अन्तर्वार्तामा भनेकी छन्, ‘वर्षमा भन्दै १०० एपिसोड खिच्नुपथ्र्यो । यसका लागि मैले फिल्मको काम गर्न भ्याइनँ । पहिला प्रस्ताव आउँदा अस्वीकार गरेँ । अहिले प्रस्ताव नै आउन छाडे ।’

उनी चारदशक देखि बलिउडमा सक्रिय छन् । तर, पछिल्लो समय मेकरहरूले नै शो जजका रुपमा चिन्दा उनी सन्तुष्ट छैनन् ।

उनी भन्छिन्, ‘मैले मेकरहरूलाई नै नायिका हुँ भनेर चिनाउन सकेको छैन । उनीहरूलाई मेरो काम सोफामा बसेर हाँस्ने मात्रै हो जस्तो लाग्छ ।’

अहिले अर्चना कपिलको ‘द ग्रेट इन्डियन कपिल शो’को जज मध्येको एक हुन् ।

१०० भन्दा बढी फिल्ममा अभिनय गरेकी उनको प्राइम समय सन् १९९० को दशक हो । सन् २००० को दशकका पनि उनी सक्रिय थिइन् ।