काठमाडौं – प्रहरी महानिरीक्षक दान बहादुर कार्कीले सुर्खेतमा भएको इनिशा बिक हत्या प्रकरणमा तथ्य र प्रमाणका आधारमा अनुसन्धान भइरहेको बताएका छन् ।

अन्तर्राष्ट्रिय जाति तथा रंगभेद उन्मूलन दिवसको अवसरमा शनिबार काठमाडौंमा आयोजित कार्यक्रममा बोल्दै उनले उक्त घटनामा कानुनलाई अक्षरशः पालना गर्दै निष्पक्ष अनुसन्धान भइरहेको जानकारी दिए ।

प्रहरी महानिरीक्षक कार्कीले पीडित परिवारसँग निरन्तर सम्पर्कमा रहेको उल्लेख गर्दै दोषीलाई कारवाही गरी न्याय दिलाइने प्रतिबद्धता व्यक्त गरे । उनले न्यायको माग उठिरहेको आवाजको सुनुवाइ हुने विश्वास दिलाउँदै अनुसन्धानका लागि आवश्यक जनशक्ति परिचालन गरिएको र छिट्टै घटनाको निष्कर्ष सार्वजनिक हुने बताए ।

कार्यक्रममा उनले सबै नागरिकले समान हकअधिकार पाउनुपर्नेमा जोड दिँदै कुनै पनि प्रकारको विभेद सह्य नहुने स्पष्ट पारे । विभेदविरुद्ध कानून बमोजिम कडाइका साथ अघि बढ्ने प्रहरीको प्रतिबद्धता पनि उनले दोहोर्‍याए ।