गौर- साम्प्रदायिक हिंसा नियन्त्रणका लागि रौतहटको सदरमुकाम गौरका विभिन्न स्थानमा सयौँको सङ्ख्यामा नेपाल प्रहरी, सशस्त्र प्रहरी बल र नेपाली सेना परिचालन गरिएको छ ।

सुरक्षा सतर्कताका बावजुद गौरका भित्री भेगमा छिटफुट होहल्ला र नाराबाजी भने जारी नै रहेको स्थानीयले जनाएका छन् ।

रमजानको प्रार्थाना चलिरहेका बेला चर्को आवाजमा विवाहको डिजे बजाएको निहुँमा तनाव शुरु भएको थियो । तनाव साम्य पार्न जिल्ला प्रशासन कार्यालयको पहलमा दुई समुदायका अगुवाबीच शुक्रबार साँझ ६ बुँदे सहमति भएको थियो ।

यद्यपि शनिबार बिहानैदेखि गौरमा फेरि साम्प्रदायिक हिंसा शुरु भएको थियो । हिंसा नियन्त्रणका लागि जिल्ला प्रशासनले दिउँसो एक बजेदेखि अनिश्चितकालीन कर्फ्यू आदेश जारी गरेको छ । पूर्वमा मुडवलवा गेट, पश्चिमतर्फ ललवैया बाँध, उत्तरमा बम नहर र दक्षिणतर्फ गौर भन्सार कार्यालय गेटसम्म कर्फ्यू आदेश जारी गरिएको छ ।

कर्फ्यू आदेश जारी भएका क्षेत्रमा कुनै व्यक्ति आवत–जावत गर्न, भेला गर्न, सभा, जुलुस तथा प्रदर्शन गर्न नपाउने जिल्ला प्रशासन कार्यालयले जनाएको छ ।