दमक– यही फागुन २१ गते हुने प्रतिनिधिसभा सदस्य निर्वाचनका लागि नेकपा एमालेले चुनाव लक्षित घर दैलो कार्यक्रम टोल र वडामा केन्द्रित गरेको छ ।

नेकपा एमाले वडा कमिटी दमक– ८ ले फागुन २१ गते हुने निर्वाचन कार्यक्रम लक्षित घरदैलो कार्यक्रमलाई तीव्रता दिएको हो ।

वडा कमिटी दमक– ८ को निर्वाचन परिचालन कमिटीले आज वडा भित्रको सरस्वती टोल कमिटी र हिजो किरात कञ्चन टोलमा चुनावी घरदैलो कार्यक्रम सम्पन्न गरेको छ ।

दमक– ८ को वडा कार्यालय छेउबाट सुरु भएको घरदैलो कार्यक्रम सरस्वती टोलको अर्गानिक सब्जी मण्डी, साझा डेरी, वडा नम्बर ८ मा पर्ने दमक हस्पिटल, मकालु मार्ग हुँदै अन्तमा सजिलो मार्ट अगाडि पुगेर घरदैलो कार्यक्रम सकिएको निर्वाचन परिचालन कमिटी संयोजक धर्म प्रसाद दाहाल (दिपेश)ले जानकारी दिए ।

घरदैलो गर्ने क्रममा मतदाताहरूसँग भेटघाटका साथै मत माग्ने काम गरिएको एमाले वडा कमिटी दमक– ८ का उपाध्यक्ष युवराज आचार्यले जानकारी दिए ।

किरात कचन अन्तर्गतको घरदैलो गर्ने क्रममा किरात चोकबाट सुरु भएको घरदैलो विकास मार्ग, आइतबारे लगायतको घर–घरमा पुगेर मतदातासँग मत माग्ने काम भएको एमाले वडा निर्वाचन परिचालन कमिटी संयोजक तथा दमक– ८ का वडा अध्यक्ष दाहालले जानकारी दिए ।

यस्तै, आजै दिउँसो ४ बजे दमक– ८ कै कोरोनेशन होटल अगाडि भेला भएर घरदैलो गर्ने काम रहेको एमाले वडा कमिटी दमक– ८ ले जनाएको छ ।