टोकियो- जापानतर्फ अघि बढिरहेको टाइफुन ‘डुजुआन’ का कारण सोमबार सयौँ उडान रद्द गरिएका छन् भने १६ लाखभन्दा बढी मानिसलाई सुरक्षित स्थानमा सर्न आग्रह गरिएको छ।

मौसमविद्ले टाइफुनका कारण राजधानी टोकियोसहित आसपासका क्षेत्रमा भारी वर्षा र तीव्र हावाहुरी आउन सक्ने तथा केही स्थानमा कीर्तिमानी वर्षा हुन सक्ने चेतावनी दिएका छन्।

जापानको कात्सुउरा सहरबाट करिब १३० किलोमिटर दक्षिणमा रहेको टाइफुन डुजुआनले प्रतिघण्टा करिब १४४ किलोमिटरको गतिमा हावा चलाइरहेको थियो। आँधी उत्तरतर्फ अघि बढेसँगै टोकियो र आसपासका क्षेत्रमा यसको प्रभाव बढ्दै गएको छ।

जापान एयरलाइन्सले १३५ र अल निप्पोन एयरवेजले १४० उडान रद्द गरेका छन्। टोकियो आसपासका नौ हजारभन्दा बढी घरमा विद्युत् सेवा अवरुद्ध भएको छ। टोकियो, चिबा, कानागावा र सिजुओका प्रिफेक्चरमा पहिरोको चेतावनी जारी गरिएको छ भने केही रेल सेवा पनि स्थगित गरिएका छन्।

जापानको मौसम विज्ञान एजेन्सी (जेएमए) का अनुसार मङ्गलबारसम्म हुने वर्षाले सेप्टेम्बर महिनाको औसत वर्षा नाघ्न सक्नेछ। केही क्षेत्रमा कीर्तिमानी वर्षा हुने सम्भावनासमेत रहेको एजेन्सीले जनाएको छ। टाइफुनको प्रभाव सुरु हुनुअघि नै वर्षा र हावाको गति बढ्ने चेतावनी दिइएको थियो।

विपद् व्यवस्थापन अधिकारीहरूले राजधानी टोकियो र आसपासका क्षेत्रमा १६ लाखभन्दा बढी बासिन्दालाई सुरक्षित स्थानमा सर्न आग्रह गरेका छन्। यद्यपि, उक्त आग्रह अनिवार्य गरिएको छैन।

टाइफुनका कारण हालसम्म एक जना सामान्य घाइते भएका छन् भने नौ घरमा क्षति पुगेको बताइएको छ।

आँधीका कारण चिबामा भइरहेको ‘टोकियो गेम शो’ सोमबार निर्धारित समयभन्दा अगावै बन्द गरिएको छ। चिबामै आयोजना हुने ठूलो खुला सङ्गीत महोत्सव र बेसबल खेल पनि रद्द गरिएका छन्।

सामाजिक सञ्जालमा सार्वजनिक तस्बिरहरूमा लोकप्रिय पर्यटकीय स्थल कामाकुरा स्टेसन आसपासका सडक डुबानमा परेको देखिएको छ। कामाकुराका मेयर ताकासी मात्सुओले सडकमा पानी जमेकाले कारमा यात्रा गर्नु जोखिमपूर्ण रहेको बताएका छन् ।