काठमाडौँ- राहदानी विभागअगाडि ऋद्धिसिद्धी यातायातको बसमा भएको आगलागीको घटनाबारे छानबिन गर्न प्रहरीले समिति गठन गरेको छ ।

उक्त घटनामा ट्राफिक प्रहरीको संलग्नताबारे छानबिन गर्न प्रहरीले समिति गठन गरेको हो ।

राहदानी विभाग अगाडि बसभित्रै आगो लगाएर आत्मदाहको प्रयास गर्नुअघि चालक दावा लामा र ट्राफिक प्रहरीबीच भनाभन भएको देखिन्छ । बस चालक दावा लामा र ट्राफिक प्रहरीको टोलीबीच भनाभन भएको भिडियो सामाजिक सञ्जालमा भाइरल भइरहेको छ ।

उपत्यका प्रहरी कार्यालय रानीपोखरीले एसएसपी रमेश बस्नेतको संयोजकत्वमा छानबिन समिति गठन गरेको हो ।

समितिलाई घटनाबारे छानबिन गर्न पाँच दिनको समय दिइएको छ । हाल चालक लामाको चिन्ताजनक अवस्थामा कीर्तिपुरस्थित बर्न अस्पतालमा उपचार भइरहेको छ ।

त्रिपुरेश्वरमै यसअघि पठाओ चालक गणेश नेपालीले पनि आत्मदाहको प्रयास गरेका थिए। पछिल्लो घटनाले नागरिक र राज्य संयन्त्रबीचको व्यवहार तथा गुनासो सम्बोधनको अवस्थामाथि समेत प्रश्न उठाएको छ।