काठमाडौं– राष्ट्रिय स्वतन्त्र पार्टीका सांसद खगेन्द्र सुनारले संघीय संसद् परिसरमा सञ्चालित क्यान्टिन तथा होटलमा चिया-खाजाको मूल्य महँगो भएको भन्दै तत्काल नियन्त्रण गर्न माग गरेका छन् ।

प्रतिनिधिसभाको बैठकमा बोल्दै सुनारले संसद् परिसरमा कालो चियाको एक सय, दूध चियाको दुई सय, ममको तीन सय, चाउमिनको चार सय र पाउरोटीको पाँच सय रुपैयाँसम्म पर्ने गरेको बताए ।

‘कालो चियाको एक सय रुपैयाँ, दूध हालेको चियाको दुई सय, ममको तीन सय, चाउमिनको चार सय, पाउरोटीको पाँच सय रुपैयाँ तिरेर खान सक्ने हैसियतमा अहिलेका सांसदहरू छन् कि छैनन् सभामुख महोदय ? ’ उनले प्रश्न गरे ।

केही दिनअघि ‘चिया खान जाउँ’ भन्ने विषयको अडियो संसदमा भाइरल भएको प्रसंग उल्लेख गर्दै उनले संसद् परिसरमा सर्वसाधारण तथा कर्मचारीले समेत सहज रूपमा चिया–खाजा खान सक्ने अवस्था नरहेको बताए ।

संसद् सचिवालयमा कार्यरत कर्मचारी तथा मर्यादापालकले समेत त्यहाँ गएर पानी खान सक्ने अवस्था नरहेको उनको दाबी थियो । उनले संसद् परिसरमा महँगो होटल सञ्चालन गर्न नहुने भन्दै तत्काल हटाउन सभामुखसमक्ष आग्रह गरे ।

‘नेपालगन्जमा, वीरगन्जमा, दैलेखको बजारमा चिया जति पर्छ, त्यो चिया पनि यहाँ त्यति नै मूल्यमा बिक्री हुनुपर्छ। मनपरी पैसा लिन पाइँदैन,’ सुनारले भने।

सिंहदरबारभित्र आवश्यकताभन्दा बढी होटल तथा क्यान्टिन सञ्चालन भइरहेको टिप्पणी गर्दै उनले संसद् परिसरमा सञ्चालित महँगो होटल तत्काल बन्द गरी सस्तो र सहज रूपमा चिया–खाजा उपलब्ध हुने व्यवस्था गर्न माग गरे ।