दोलखा– नेपाली कांग्रेसको १५औँ महाधिवेशनअन्तर्गत दोलखाका नौवटा स्थानीय तहका ७४ वडामा जारी वडा अधिवेशन अन्तिम चरणमा पुगेको छ ।

शनिबार देखि सुरु भएको वडा अधिवेशन जारी रहेको छ । कांग्रेस दोलखाको शनिबार र आइतबार ७१ वडाको अधिवेशन सम्पन्न भएको नेपाली कांग्रेस दोलखाका पार्टी सभापति बर्मा लामाले बताए।गौरीशंकर गाउँपालिकाको २ वडा र शैलुङ गाउँपालिकाको वडा नम्बर-५ बाहेक अन्य वडामा सर्वसम्मत नेतृत्व चयन भएको हो । 

अधिवेशन सम्पन्न भएका वडामध्ये भिमेश्वर नगरपालिकाका ९ वटै वडा, जिरी नगरपालिकाका ९ वटै वडा, वैतेश्वर गाउँपालिकाका ८ वटै वडा, मेलुङ गाउँपालिकाका ७ वटै वडा, तामाकोशी गाउँपालिकाका ७ वटा वडा र कालिञ्चोक गाउँपालिकाका ९ वटै वडा रहेका छन् ।

त्यसैगरी गौरीशंकर गाउँपालिकाका ९ वडामध्ये ७ वडाको अधिवेशन सम्पन्न भएको छ भने बाँकी वडा नम्बर १ र २को अधिवेशन जारी रहेको कांग्रेसले जनाएको छ । 

शैलुङ गाउँपालिकाका ८ वडामध्ये ७ वडाको अधिवेशन सम्पन्न भएको छ। शैलुङका वडा नम्बर ५ को अधिवेशन महाधिवेशन प्रतिनिधि उर्मिला कार्कीको सवारी दुर्घटनामा मृत्यु भएपछि स्थगित गरिएको नेपाली कांग्रेस शैलुङले जनाएको छ ।

शैलुङ -५ को अधिवेशन भोलि ६ गते हुने छ । त्यसैगरी विगु गाउँपालिकामा ८ वटै वडाको अधिवेशन सम्पन्न भएको छ । वडा अधिवेशन सम्पन्न भएपछि नेपाली कांग्रेसको पालिका अधिवेशन असोज ७ गते गर्ने तयारी रहेको नेपाली कांग्रेस दोलखाका पार्टी उपसभापति छवि लामाले बताए । शुवास बस्नेत/दोलखा