काठमाडौं – काठमाडौंको शंखमुलस्थित भ्याली ब्वाइज होस्टलमा कुटपिटपछि धारिलो हतियार प्रहार हुँदा प्यूठानका २२ वर्षीय युवकको मृत्यु भएको छ ।

मृत्यु हुनेमा प्यूठानको स्वर्गद्वारी नगरपालिका–वेल्बासमा जन्मिएका तथा हाल दाङको घोराही उपमहानगरपालिका–१७ बस्दै आएका बसन्त कालाथोकी रहेका छन् । उनी शंखमुलस्थित उक्त होस्टलमा बस्दै आएका थिए ।

प्रहरीका अनुसार होस्टलमै बस्ने शेखर यादव र प्रमित पटेलले कालाथोकीमाथि कुटपिट गरी धारिलो हतियार प्रहार गरेका थिए। घटनामा टाउको र घाँटीमा गम्भीर चोट लागेका कालाथोकीलाई उपचारका लागि मिनभवनस्थित निजामती कर्मचारी अस्पताल लगिएको थियो ।

तर उपचारकै क्रममा चिकित्सकले उनलाई मृत घोषणा गरेका प्रहरीले जनाएको छ । घटनामा संलग्न रहेको आरोपमा यादवलाई प्रहरीले पक्राउ गरेको छ । अर्का आरोपित पटेल भने फरार रहेको र उनको खोजी भइरहेको प्रहरीले जनाएको छ। घटनाबारे थप अनुसन्धान भइरहेको छ ।