बाजुरा- गौमुल गाउँपालिका–३ कटीगाउँमा पहिरोले दुई घर पूर्ण रूपमा क्षति पुर्‍याएपछि आसपासका उच्च जोखिममा रहेका १४ घरका ११५ जनालाई सुरक्षित स्थानमा सारिएको छ।

बिहीबार दिउँसो अविरल वर्षासँगै खसेको पहिरोले ५७ वर्षीय पूर्णिमल बोहरा र ३८ वर्षीया बुदी बोहराको तीनतले घर पूर्ण रूपमा क्षतिग्रस्त भएको जिल्ला प्रहरी कार्यालय बाजुराले जनाएको छ। पहिरोमा परी दुवै घरभित्र रहेका सामानसमेत पुरिएका छन्।

जिल्ला प्रहरी कार्यालयका प्रवक्ता नरेशबहादुर शाहीका अनुसार पहिरोको जोखिम अझै कायम रहेकाले आसपासका १४ घरका ११५ जनालाई सुरक्षित स्थानमा स्थानान्तरण गरिएको हो। विस्थापित परिवारलाई अस्थायी टहरामा राखिएको छ।

पुरिएका घर तथा सामग्री निकाल्ने प्रयास भइरहेको प्रहरीले जनाएको छ। लगातारको वर्षाका कारण थप पहिरो जान सक्ने जोखिम रहेकाले स्थानीयवासीलाई समेत सतर्क रहन आग्रह गरिएको छ।

यसैबीच, गौमुल गाउँपालिका अध्यक्ष हरिबहादुर रोकायाले विस्थापित परिवारलाई राहत सामग्री उपलब्ध गराउन गाउँपालिकाबाट टोली परिचालन गरिएको बताए। उनले प्रभावित परिवारको सहयोगका लागि स्थानीय सामाजिक सङ्घसंस्थालाई समेत सहयोगमा जुट्न आह्वान गरेका छन्।