काठमाडौं । आफूविरुद्ध जारी भएको पक्राउ पुर्जी बदरको माग राखेर नेपाली कांग्रेसका सांसद अभिषेकप्रताप शाहले सर्वोच्च अदालतमा रिट निवेदन दायर गरेका छन् ।

कपिलवस्तु जिल्ला अदालतले यसअघि कुटपिट आरोपमा सांसद शाहलाई पक्राउ गरेर अनुसन्धान गर्न प्रहरीलाई अनुमति दिएको थियो । शाहमाथि कृष्णनगर उद्योग वाणिज्य संघका अध्यक्ष सीताराम शर्मामाथि कुटपिट गरेको आरोप छ ।

कुटपिट घटनामा शाहविरुद्ध मुद्दा दर्ता भई कपिलवस्तु जिल्ला अदालतबाट जारी भएको पक्राउ पुर्जी गैरकानुनी रहेको दाबीसहित सर्वोच्चमा रिट दर्ता भएको हो ।

सर्वोच्चका प्रवक्ता अर्जुन कोइरालाले पक्राउ पुर्जी बदरको माग राखेर पेस भएको रिट मंगलबार दर्ता भएको जानकारी दिए ।

गृह मन्त्रायालय, जिल्ला अदालत कपिलवस्तु र जिल्ला प्रहरी कार्यालय कपिलवस्तुलाई विपक्षी बनाएर रिट दर्ता भएको छ ।