काठमाडौं- काठमाडौंको कीर्तिपुरमा कारभित्र जलेर ज्यान गुमाएका व्यक्तिको पहिचान खुलेको छ। कारको चालक सिटमै जलेर मृत्यु भएको अवस्थामा भेटिएका व्यक्ति सुरेशचन्द्र श्रेष्ठ रहेको पुष्टि भएको छ।

उनी काठमाडौंको नरदेवी निवासी ७० वर्षीय सुरेशचन्द्र श्रेष्ठ रहेको खुलेको छ । काठमाडौंको नरदेवीमा बसोबास गर्दै आएका उनी कीर्तिपुरको चाँदनी चोकस्थित खाली जग्गामा पार्किङ गरिएको कारभित्रै जलेर बितेका थिए ।

जिल्ला प्रहरी परिसर काठमाडौंका अनुसार बा५च ३०३८ नम्बरको सेतो कार मंगलबार बिहान पार्किङ गरिएको अवस्थामा जलेको कारभित्रै श्रेष्ठ पनि खरानी भएका थिए । जलेर कंकाल मात्रै रहेको अवस्थामा भेटिएका श्रेष्ठको उनका नातेदारले सनाखत गरेका हुन् ।

जलेको उक्त कार पनि उनकै नाममा रहेको जिल्ला प्रहरी परिसर काठमाडौंका प्रवक्ता एसपी पवन भट्टराईले बताए।

उनका अनुसार कार चालक बाहिर ओर्लिनै नपाई भित्रबाटै आगो लागेको पाइएको छ । घटनाबारे थप अनुसन्धान भइरहेको उनले बताए ।