लन्डन : एन्डी बर्नहम सोमबार बेलायतका ५९औँ प्रधानमन्त्री बनेका छन्।

बकिङ्घम दरबारमा राजा चार्ल्स तृतीयसँग भएको निजी भेटपछि उनलाई सरकार गठन गर्न औपचारिक निमन्त्रणा दिइएको हो।

यसअघि तत्कालीन प्रधानमन्त्री कीर स्टार्मरले पदबाट राजीनामा दिएका थिए। त्यसलगत्तै नयाँ सरकार गठनको प्रक्रिया अघि बढाइएको हो।

यता डाउनिङ स्ट्रिटमा लेबर पार्टीका दर्जनौँ वरिष्ठ नेता भेला भएका छन्। उनीहरूमध्ये केहीले नयाँ सरकारमा महत्त्वपूर्ण जिम्मेवारी पाउने अपेक्षा गरिएको छ।

बर्नहमले यसअघि पनि लेबर पार्टीको नेतृत्वका लागि प्रतिस्पर्धा गरेका थिए तर सफल भएका थिएनन्।

सन् १९७० मा लिभरपुलमा जन्मिएका बर्नहमको बाल्यकाल वारिङ्टन नजिकको एक गाउँमा बितेको थियो।

उनका पिता ब्रिटिश टेलिकममा इन्जिनियर थिए भने आमा रिसेप्शनिस्ट थिइन्। दुवै जना लेबर पार्टीका कट्टर समर्थक रहेकाले बर्नहममा सानैदेखि राजनीतिप्रति रुचि विकास भएको बताइन्छ।