काठमाडौं– पछिल्लो २४ घण्टामा देशभर ६२ वटा विपद्जन्य घटना भएका छन् । ती घटनामा परी २ जनाको मृत्यु भएको छ भने १५ जना घाइते भएका छन् ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको दैनिक बुलेटिनअनुसार सबैभन्दा बढी २६ वटा पहिरोका घटना भएका छन् ।

पहिरोमा २ जना घाइते भएका छन् भने ६ जना घाइते भएको विवरण छ । यस्तै, सर्पदंशका १३ घटनामा २ जनाको मृत्यु भएको छ र ११ जना घाइते भएका छन् ।

बाढीका ८, आगलागीका ८, चट्याङका ५ तथा जनावर आक्रमणका ५ घटना पनि दर्ता भएका छन् । बाढीका घटनाबाट १ जना प्रभावित भएका छन् भने जनावर आक्रमणबाट १ जना घाइते भएका छन् ।

विपद्का कारण ३६ वटा घरपरिवार प्रभावित भएका छन् । साथै ११ वटा सडक अवरुद्ध भएका छन् भने करिब १२ लाख ७९ हजार रुपैयाँ बराबरको धनमाल क्षति भएको प्राधिकरणले जनाएको छ ।

बुलेटिनअनुसार साउन ३ गते बिहान १० बजेदेखि साउन ४ गते बिहान १० बजेसम्मका घटनाहरूको विवरण समेटिएको हो । प्राधिकरणले मनसुन सक्रिय रहेकाले बाढी, पहिरो तथा चट्याङबाट सतर्क रहन सर्वसाधारणलाई आग्रह गरेको छ ।