काठमाडौँ – निक्कै प्रतिस्पर्धात्मक तर केही खिन्न मानिएको फिफा विश्वकप २०२६ को फाइनल खेलसँगै स्पेनले उपाधि उचालेको छ । स्पेनको यस ऐतिहासिक जितसँगै फुटबल इतिहासमा केही दुर्लभ र रोचक तथ्यांकहरू थपिएका छन् । अमेरिकाको न्युयोर्कस्थित न्युजर्सी स्टेडियममा आज भएको खेलको निर्धारित ९० मिनेटसम्म दुवै टोलीबाट गोल हुन नसकेपछि खेल अत्तिरिक्त समयमा धकेलिएको थियो ।

अत्तिरिक्त समयमा स्पेनका फेर्रान टोरेजले गोल गरे । उनले खेलको १०६औँ मिनेटमा गोल गर्दै अर्जेन्टिनाविरुद्ध एक शून्यको अग्रता लिएका थिए । त्यसपछि खेलमा थप गोल हुन सकेन र स्पेनले अर्जेन्टिनामाथि एक शून्य गोलको जित हासिल गर्यो ।

युरो कप र विश्वकपको दुर्लभ संयोग
युरोपेली च्याम्पियनको हैसियतमा विश्वकप जित्ने स्पेन तेस्रो टोली बनेको छ । यसअघि सन् २००८ को युरो कप जितेपछि स्पेनले नै सन् २०१० को विश्वकप चुमेको थियो । त्यसअघि सन् १९७२ को युरो जितेको तत्कालीन पश्चिम जर्मनीले सन् १९७४ मा विश्वकप उपाधि आफ्नो पोल्टामा पारेको थियो ।

रक्षापंक्तिको ऐतिहासिक कीर्तिमान
यो विश्वकप यात्राभरि स्पेनिस टोलीले इतिहासकै सबैभन्दा बलियो रक्षापंक्ति प्रदर्शन गर्‍यो । स्पेन विश्वकपको इतिहासमै सबैभन्दा कम (मात्र एक) गोल ब्यहोरेर च्याम्पियन बन्ने पहिलो टोली बनेको छ । यसअघि सन् २००६ को विश्वकपमा स्विट्जरल्याण्डले कुनै पनि गोल नब्यहोरी बाहिरिएको रेकर्ड राखेको भए पनि च्याम्पियन टोलीका रूपमा स्पेनको यो नतिजा सर्वोत्कृष्ट हो ।

अपराजित प्रशिक्षक फुएन्ते
स्पेनका मुख्य प्रशिक्षक लुइस डे ला फुएन्तेले मुख्य प्रतियोगितामा आफ्नो अपराजित यात्रालाई १५ खेल पुर्‍याएका छन् । विश्वकप र युरो कप जस्ता ठूला प्रतियोगितामा कुनै पनि प्रशिक्षकले सम्हालेको यो अहिलेसम्मकै सबैभन्दा लामो अपराजित सुरुवात हो ।