काठमाडौं– खानेपानीमा लगाइएको सबै प्रकारको कर छुटको माग गर्दै उपभोक्ता अधिकारकर्मीहरूले काठमाडौंमा प्रदर्शन गरेका छन् । 

खानेपानीमा समेत कर लगाउँदा उपभोक्ताहरू मर्कामा परेको भन्दै खानेपानी तथा सरसफाइ उपभोक्ता महासंघ नेपाल (फेडवासन)ले बुधबार काठमाडौंको माइतीघरमा विरोध प्रदर्शन गरेका हुन् । 

उनीहरूले खानेपानीमा लगाइएको कर छुट गर्नुपर्ने माग राखेका छन् । साथै उनीहरूले विद्युत् महसुल छुटको समेत माग गरेका छन् । फेडवासनका अध्यक्ष राजेन्द्र अर्यालले फेडवासनले खानेपानीमा सरकारले २५ प्रतिशत कर लगाउने प्रयास गरेको भन्दै तत्काल कर लगाउने निर्णय फिर्ता लिन माग गरे । 

खानेपानी क्षेत्रलाई सरकारले प्राथमिकतामा राखेर आवश्यक बजेट विनियोजन गर्नुपर्ने उनले बताए । प्रदर्शनमा सहभागीहरूले उपभोक्ताहरूको अधिकार सुनिश्चित गर, खानेपानीमा लगाइएको सबै प्रकारका कर छुट गर लगायतका प्लेकार्ड प्रदर्शन गरेका छन् ।