काठमाडौं- नेकपा एमालेका सांसद गुरुप्रसाद बरालले उपत्यकासहित विभिन्न स्थानबाट हटाइएका सुकुम्वासीमाथि वालेन्द्र शाह नेतृत्वको सरकारको अमानवीय व्यवहार नरोकिएको बताएका छन्।

बुधबार बसेको प्रतिनिधि सभाको आकष्मिक समयमा सम्बोधनका क्रममा उनले यस्तो बताएका हुन् ।

‘हिजो मात्रै नेपाल सरकारले गम्भीर त्रुटि गरेको छ। दिगो बसोबासको व्यवस्था नगरी सुकुमवासीलाई उठिबास लगाएको छ। त्यो सरकार यो जेठ, असार र साउनका हरेक परिवारलाई १५ /१५ हजार दिन्छौँ भन्दैछ । यसरी दैनिक एक सयका दरले कसरी एउटा परिवार काठमाडौंमा बाँच्न सक्छ?’, उनले भने, ‘यो सुकुम्वासीमाथि गरिएको अमानवीय हमला हो । अस्थायी बास बसेको ठाउँबाट उनीहरूलाई बलजफ्ति निकालिकएो छ। होल्डिङ सेन्टरमा अमानवीय व्यवहार भएको छ।’

उनले हचुवाका भरमा पुनर्स्थपनाका लागि भन्दै २५ हजार दिने कुराले सुकुम्वासीलाई झन् समस्यामा पार्ने पनि बताएका छन् । बरालले सरकारको यो किसिमको व्यवहारले समस्यामा परेका सुकुम्वासी झन् झन् अपमानित हुँदै गएको गुनासो गरे ।