काठमाडौँ- मध्यपूर्व (पश्चिम एसिया) मा जारी युद्धका बीच गत फेब्रुअरी २८ देखि हालसम्म करिब ३ लाख मानिस खाडी मुलुकहरूबाट भारत फर्किएका छन्।

भारतीय विदेश मन्त्रालयका अतिरिक्त सचिव (गल्फ) असीम आर महाजनका अनुसार यूएईबाट शुक्रबार पनि करिब ९० वटा उडान सञ्चालन भइरहेका छन्। ओमान र साउदी अरेबियाबाट पनि नियमित उडान जारी रहेको उनले बताए।

कतारको आकाशीय मार्ग आंशिक रूपमा खुलेपछि केही उडान पुनः सुरु भएका छन् । कुवेत र बहराइनको एयरस्पेस अझै बन्द छ। कुवेत र बहराइनमा अलपत्र भारतीयलाई उद्धार गर्न विशेष उडानको व्यवस्था गरिएको छ।

यसैबीच, युद्धकै कारण खाडी मुलुकहरूमा ६ जना भारतीय नागरिकको मृत्यु भएको छ भने एकजना अझै बेपत्ता रहेका छन्।

भारतीय विदेश मन्त्रालयका अनुसार साउदी अरेबिया, ओमान, इराक र युएईस्थित भारतीय दूतावासहरू स्थानीय प्रशासनसँग समन्वय गर्दै बेपत्ता व्यक्तिको खोजी र मृतकको शव स्वदेश ल्याउने प्रयासमा छन् ।