काठमाडौं- जल तथा मौसम विज्ञान विभागले शुक्रबार अपराह्नपछि विशेषगरी तराईका केही जिल्लामा हुरीसहित असिना पानी परिरहेको जनाएको छ।

जसका कारण देशभरको मौसम दिउँसै अन्धकारमा परिणत हुँदा हवाई उडानहरू प्रभावित भएका छन् । विभागले ठूलो पानी आँधीहुरीसहित पर्ने भन्दै सर्वसाधारणलाई उच्च सतर्कता अपनाउन आग्रह गरेको हो।

अहिले काठमाडौं उपत्यकासहित देशका विभिन्न भागमा पानी परिरहेको छ। मौसम बिग्रिँदा काठमाडौंमा आउने र बाहिरिने हवाई उडान पनि प्रभावित भएको छ।

पछिल्लो पटक चीनको खुन्मिङबाट आएको चाइना इस्टर्न एयरलाइन्सको जहाज अवतरण हुन नसकी भारततर्फ डाइभर्ट गरिएको छ।

खुन्मिङबाट अपराह्न ४ बजे अवतरण गर्ने तालिकासहित आएको चाइना इस्टर्न एरलाइन्सको उडान नम्बर एमयु ९६१७ नम्बर कोलकाता डाइभर्ट भएको हो ।

उता आन्तरिक उडान पनि ठप्प भएको छ। विराटनगर र भद्रपुरबाटसहितका आन्तरिक उडानहरूलाई काठमाडौं आउन नदिई उतै फर्काइएको छ। अहिले त्रिभुवन विमानस्थल पूरै बन्द भएको छ ।